തിരുവനന്തപുരം: പ്രതിപക്ഷ ഉപനേതാവ് പദവിയുടെ കാര്യത്തില്‍ ഒരു ചുവടുപോലും പിന്നോട്ടില്ലെന്ന് ആവര്‍ത്തിച്ച് സിപിഐ. പ്രതിപക്ഷ ഉപനേതാവ് പദവി കിട്ടിയേ തീരൂവെന്ന ആവശ്യത്തില്‍ ഉറച്ചുനില്‍ക്കാന്‍ സിപിഐ സംസ്ഥാന സെക്രട്ടറിയേറ്റ് യോഗത്തില്‍ തീരുമാനം. വീട്ടുവീഴ്ച ചെയ്യേണ്ടതില്ലെന്നും സിപിഎമ്മിന് മുന്നില്‍ മുട്ടുമടക്കേണ്ടതില്ലെന്നും യോഗത്തില്‍ ആവശ്യമുയര്‍ന്നു. തങ്ങള്‍ നിലപാടില്‍ ഉറച്ചുനില്‍ക്കുകയാണെന്നും അനുകൂല തീരുമാനം ഉണ്ടാകാമെന്നും സിപിഐ സംസ്ഥാന സെക്രട്ടറി ബിനോയ് വിശ്വം പ്രതീക്ഷ പ്രകടിപ്പിച്ചു.

'ഞങ്ങള്‍ എല്‍ഡിഎഫിന് ഭാഗമാണ്. എല്‍ഡിഎഫിന്റെ വളര്‍ച്ചയിലും താഴ്ചയിലും സിപിഐയുടെ പങ്കുണ്ട്. എല്‍ഡിഎഫ് എന്ന മുന്നണി എത്രമാത്രം സിപിഎമ്മിന്റേതാണോ അത്രയും സിപിഐയുടേതുകൂടിയാണ്', ബിനോയ് വിശ്വം കൂട്ടിച്ചേര്‍ത്തു. 

പദവിയെച്ചൊല്ലി സിപിഎമ്മിലും സിപിഐയും തമ്മില്‍ തര്‍ക്കം കടുക്കുകയാണ്. വിട്ടുവീഴ്ച്ച ആവശ്യമില്ലെന്നും, പരസ്യമായി ആവശ്യപ്പെട്ട പദവിയില്‍ നിന്നും പിന്നോട്ട് പോകേണ്ടതില്ലെന്നുമാണ് സിപിഐ നിലപാട്. എന്നാല്‍ പ്രതിപക്ഷ ഉപനേതൃപദവി നല്‍കാനാവില്ലെന്ന നിലപാടിലാണ് സിപിഎം. കഴിഞ്ഞ ദിവസം ഇരുപാര്‍ട്ടികളുടെയും സംസ്ഥാന സെക്രട്ടറിമാര്‍ നടത്തിയ ചര്‍ച്ച പരാജയപ്പെട്ടിരുന്നു.