മനാമ:ബഹ്‌റൈനിനെതിരെയുണ്ടായ ആക്രമണത്തെ ശക്തമായി അപലപിച്ച് കുവൈത്ത് രംഗത്ത്. ഇത്തരം ആക്രമണങ്ങൾ ഒരു രാജ്യത്തിന്റെ പരമാധികാരത്തിനും പ്രദേശിക സുരക്ഷയ്ക്കുമെതിരായ ഗുരുതര ഭീഷണിയാണെന്ന് കുവൈത്ത് വിദേശകാര്യ മന്ത്രാലയം പ്രസ്താവനയിൽ വ്യക്തമാക്കി. ഗൾഫ് മേഖലയിലെ സമാധാനവും സ്ഥിരതയും തകർക്കുന്ന നടപടികൾ ഒരിക്കലും അംഗീകരിക്കാനാവില്ലെന്നും മന്ത്രാലയം ചൂണ്ടിക്കാട്ടി.

ബഹ്‌റൈന്റെ സുരക്ഷയും സ്ഥിരതയും ഉറപ്പാക്കുന്നതിനുള്ള എല്ലാ നടപടികൾക്കും കുവൈത്തിന്റെ പൂർണ പിന്തുണ ഉണ്ടാകുമെന്നും പ്രസ്താവനയിൽ അറിയിച്ചു. സഹോദരരാജ്യമായ ബഹ്‌റൈനിനൊപ്പമാണെന്നും രാജ്യത്തിന്റെ സുരക്ഷയെ ബാധിക്കുന്ന ഏത് സാഹചര്യത്തിലും ഐക്യദാർഢ്യത്തോടെ നിലകൊള്ളുമെന്നും കുവൈത്ത് വ്യക്തമാക്കി.

മേഖലയിൽ വർധിച്ചു വരുന്ന സംഘർഷാവസ്ഥ ആശങ്കാജനകമാണെന്നും പ്രശ്നങ്ങൾ സൈനിക നീക്കങ്ങളിലൂടെ അല്ല, നയതന്ത്ര ചർച്ചകളിലൂടെയും സമാധാനപരമായ മാർഗങ്ങളിലൂടെയും പരിഹരിക്കേണ്ടതുണ്ടെന്നും കുവൈത്ത് ആവശ്യപ്പെട്ടു. ഗൾഫ് രാജ്യങ്ങളുടെ സുരക്ഷയും സമുദ്ര ഗതാഗത പാതകളുടെ സംരക്ഷണവും ആഗോള സാമ്പത്തിക രംഗത്തിനും നിർണായകമാണെന്നും അധികൃതർ അഭിപ്രായപ്പെട്ടു.

അതേസമയം, ബഹ്‌റൈനിനെതിരായ ആക്രമണത്തെ നിരവധി ഗൾഫ് രാജ്യങ്ങളും അറബ് സംഘടനകളും അപലപിച്ചിട്ടുണ്ട്. മേഖലയിലെ സമാധാനവും സുരക്ഷയും സംരക്ഷിക്കാൻ രാജ്യങ്ങൾ തമ്മിലുള്ള സഹകരണം കൂടുതൽ ശക്തമാക്കേണ്ട സമയമാണിതെന്നാണ് വിവിധ രാജ്യങ്ങളുടെ പ്രതികരണം.

Kuwait strongly condemned the attack on Bahrain and expressed solidarity with the Kingdom, stressing the importance of regional security and stability in the Gulf.