മലപ്പുറം: സംസ്ഥാനത്ത് പ്ലസ് വൺ ഏകജാലക പ്രവേശനത്തിന്റെ ട്രയൽ അലോട്ട്മെന്റ് പട്ടിക പ്രസിദ്ധീകരിച്ചപ്പോൾ മലപ്പുറം ജില്ലയിൽ ആശങ്ക. ജില്ലയിൽ അപേക്ഷിച്ച വിദ്യാർഥികളിൽ പകുതിയിലേറെ പേർക്കും ട്രയൽ അലോട്ട്മെന്റിൽ ഇടം നേടാനായില്ല. മറ്റ് ജില്ലകളിൽ നിന്നുള്ള 8,198 പേരുൾപ്പെടെ ആകെ 82,665 വിദ്യാർഥികളാണ് മലപ്പുറം ജില്ലയിൽ നിന്ന് അപേക്ഷ സമർപ്പിച്ചിരുന്നത്. എന്നാൽ ഇതിൽ 40,373 പേർക്ക് മാത്രമാണ് അലോട്ട്മെന്റ് ലഭിച്ചത്. 42,292 അപേക്ഷകർ നിലവിൽ ലിസ്റ്റിന് പുറത്താണ്.

പതിനേഴായിരത്തിലേറെ സീറ്റുകൾ ഒഴിഞ്ഞുകിടക്കുന്നു

ഭിന്നശേഷി വിഭാഗത്തിനായുള്ള 410 സീറ്റുകൾ ഉൾപ്പെടെ ആകെ 57,695 സീറ്റുകളാണ് ജില്ലയിലുള്ളത്. ഇതിൽ ജനറൽ വിഭാഗത്തിലെ 26,701 സീറ്റുകളിലും മുസ്‌ലിം വിഭാഗത്തിലെ 2,999 സീറ്റുകളിലും പൂർണമായി അലോട്ട്മെന്റ് നടന്നു കഴിഞ്ഞു.

അതേസമയം, വിവിധ സംവരണ വിഭാഗങ്ങളിലായി 17,322 സീറ്റുകൾ ഇപ്പോഴും ഒഴിഞ്ഞുകിടക്കുകയാണ്. എസ്.സി, എസ്.ടി വിഭാഗങ്ങളിലും സാമ്പത്തിക പിന്നാക്ക വിഭാഗങ്ങളിലുമാണ് ഏറ്റവും കൂടുതൽ സീറ്റുകൾ ഒഴിവുള്ളത്.

ഒഴിവുള്ള സീറ്റുകളുടെ വിശദവിവരം (ആകെ സീറ്റ് - അലോട്ട്മെന്റ് ലഭിച്ചവർ - ഒഴിവ് എന്ന ക്രമത്തിൽ):

ഈഴവ, തിയ്യ, ബില്ലവ (ETB): 3294 - 3253 - 41

എൽ.സി/ എസ്.ഐ.യു.സി/ ആംഗ്ലോ ഇന്ത്യൻ: 1288 - 48 - 1240

ക്രിസ്ത്യൻ (OBC): 439 - 36 - 403

ഹിന്ദു (OBC): 1288 - 660 - 628

എസ്.സി (SC): 8127 - 4451 - 3676

എസ്.ടി (ST): 5357 - 202 - 5155

ഭിന്നശേഷിക്കാർ: 1058 - 604 - 454

ബ്ലൈൻഡ്: 281 - 24 - 257

ധീവര: 849 - 15 - 834

വിശ്വകർമ: 849 - 838 - 11

കുശവൻ അനുബന്ധ വിഭാഗങ്ങൾ: 439 - 87 - 352

കുടുംബി: 439 - 0 - 439

സാമ്പത്തിക പിന്നാക്കക്കാർ (EWS): 4287 - 455 - 3832

തിരുത്തലുകൾക്ക് ജൂൺ 10 വരെ സമയം

ട്രയൽ അലോട്ട്മെന്റ് എന്നത് അപേക്ഷകർക്ക് സീറ്റ് ലഭിക്കാനുള്ള സാധ്യത മാത്രമാണ് സൂചിപ്പിക്കുന്നത്. ഇതിന്റെ അടിസ്ഥാനത്തിൽ അപേക്ഷകർക്ക് തങ്ങളുടെ ഓപ്ഷനുകളിൽ തിരുത്തലുകൾ വരുത്താം.

ജൂൺ 10-ന് വൈകീട്ട് 5 മണി വരെയാണ് തിരുത്തലുകൾ വരുത്താൻ സമയം അനുവദിച്ചിട്ടുള്ളത്. അപേക്ഷകർക്ക് കാൻഡിഡേറ്റ് ലോഗിനിലെ 'Edit Application' എന്ന ലിങ്ക് വഴി ആവശ്യമായ മാറ്റങ്ങളോ കൂട്ടിച്ചേർക്കലുകളോ വരുത്തി അഞ്ചുമണിക്ക് മുൻപായി ഫൈനൽ കൺഫർമേഷൻ നൽകേണ്ടതാണ്.

മുമ്പ് ജൂൺ 3-നകം ഫൈനൽ കൺഫർമേഷൻ നൽകാൻ സാധിക്കാത്തവർക്കും ഈ ഘട്ടത്തിൽ അപേക്ഷ സമർപ്പണം പൂർത്തിയാക്കാൻ അവസരമുണ്ട്. പ്രവേശനത്തിനായുള്ള ഒന്നാം അലോട്ട്മെന്റ് ജൂൺ 15-ന് പ്രസിദ്ധീകരിക്കും.

The results of the Plus One (Class 11) trial allotment in Kerala have been released, revealing a severe shortage of higher secondary seats in the Malappuram district.