കോഴിക്കോട്: കോഴിക്കോട് മെഡിക്കല്‍ കോളജില്‍ രക്തം സൂക്ഷിക്കുന്നതില്‍ പ്രതിസന്ധി. ട്രാന്‍ഷന്‍ മെഡിസിന്‍ വിഭാഗത്തിലെ കോള്‍ഡ് റൂമുകളുടെ നാല് ഔട്ട്‌ഡോര്‍ യൂണിറ്റുകളുടെ കോപ്പര്‍ വയറുകള്‍ മോഷണം പോയി. ബ്ലഡ് ബാങ്കിലെ രക്തം സൂക്ഷിക്കുന്ന യൂണിറ്റിന്റെ കോപ്പര്‍ വയറുകളാണ് മോഷണം പോയത്. ഇതോടെ രക്തം സൂക്ഷിക്കാന്‍ കഴിയാത്ത സാഹചര്യമായി. 

മലബാറിലെ തന്നെ ഏറ്റവും തിരക്കുള്ള മെഡിക്കല്‍ കോളജിലാണ് കോള്‍ഡ് റൂമുകളുടെ നാല് ഔട്ട്‌ഡോര്‍ യൂണിറ്റുകളുടെ കോപ്പര്‍ വയറുകള്‍ മോഷണം പോയിരിക്കുന്നത്. നാലുമീറ്റര്‍ വീതമുള്ള കോപ്പര്‍ പൈപ്പുകള്‍ പൂര്‍ണമായി മുറിച്ചെടുത്തിട്ടുണ്ട്. കോപ്പര്‍പൈപ്പുകള്‍ മുറിച്ചെടുത്തതോടെ കംപ്രസര്‍ യൂണിറ്റില്‍ വെള്ളംകയറി കോള്‍ഡ് റൂമും സംവിധാനം പൂര്‍ണമായി പ്രവര്‍ത്തനരഹിതമായി.നിലവില്‍ രക്തം സൂക്ഷിക്കാന്‍ പകരം സംവിധാനം ഇല്ല, മറ്റ് വകുപ്പുകളുടെ ഫ്രഡ്ജുകളിലാണ് നിലവില്‍ രക്തം സൂക്ഷിക്കുന്നത്. 

അതേസമയം കഴിഞ്ഞ ഞായാറാഴ്ചയാണ് സംഭവം നടക്കുന്നതെങ്കിലും വളരെ വൈകിയാണ് പ്രതിസന്ധി ലോകം അറിയുന്നത്. മോഷണക്കേസില്‍ മെഡിക്കല്‍ കോളജ് പൊലീസ് കേസെടുത്ത് അന്വേഷണം ആരംഭിച്ചു.