ഉദുമ: ഉദുമ ഗ്രാമപഞ്ചായത്ത് പ്രസിഡന്റ് സി.പി.എമ്മിലെ പി.വി രാജേന്ദ്രനെതിരെ യു.ഡി.എഫ് കൊണ്ടുവന്ന അവിശ്വാസം പാസായി. പതിനൊന്നിനെതിരേ 12 വോട്ടുകള്‍ നേടിയാണ് അവിശ്വാസം പാസായത്. ഇതോടെ നറുക്കെടുപ്പിലൂടെ പ്രസിഡന്റ് സ്ഥാനത്തെത്തിയ ഉദുമ ഗ്രാമപഞ്ചായത്ത് പ്രസിഡന്റ് പി.വി. രാജേന്ദ്രന്‍ പുറത്തായി. 

ഉദുമ പഞ്ചായത്ത് ഭരണസമിതിയില്‍ യു.ഡി.എഫിന് 12, എല്‍.ഡി.എഫിന് 11 എന്നിങ്ങനെയാണ് അംഗങ്ങള്‍. 

അന്നത്തെ തെരഞ്ഞെടുപ്പില്‍ യു.ഡി.എഫിന്റെ പ്രസിഡന്റ് സ്ഥാനാര്‍ഥിയായ ചന്ദ്രന്‍ നാലാംവാതുക്കലിന്റെ ബാലറ്റ് പേപ്പറിന്റെ പിറകില്‍ ഒപ്പ് ഇല്ലാത്തതിനാല്‍ വോട്ട്  അസാധുവായി. വോട്ടുകള്‍ തുല്യനിലയിലായതിനെ തുടര്‍ന്ന് നടന്ന നറുക്കെടുപ്പിലാണ് രാജേന്ദ്രന് വിജയിച്ചത്. 

ഒരിക്കല്‍ തെരഞ്ഞെടുക്കപ്പെട്ട് കഴിഞ്ഞാല്‍ അവിശ്വാസം കൊണ്ടുവരാന്‍ ആറുമാസം കഴിയണമെന്നാണ് ചട്ടം. പി.വി. രാജേന്ദ്രന്‍ ഡിസംബര്‍ 26നാണ് പ്രസിഡന്റ് ആയത്. പ്രസിഡന്റ് പദവിയില്‍ ജൂണ്‍ 26ന് ഇദ്ദേഹം ആറുമാസം പൂര്‍ത്തിയാക്കിയിട്ടുണ്ട്. ഇതിന് പിന്നാലെയാണ് യു.ഡി.എഫ് അവിശ്വാസം കൊണ്ടുവന്നത്. 

കാഞ്ഞങ്ങാട് ബ്ലോക്ക് പഞ്ചായത്ത് സെക്രട്ടറി കെ.സി. രജിതയുടെ മേല്‍നോട്ടത്തിലായിരുന്നു അവിശ്വാസപ്രമേയം അവതരിപ്പിച്ച് വോട്ടെടുപ്പ് നടന്നത്. പ്രസിഡന്റ് പുറത്തായതോടെ വൈസ് പ്രസിഡന്റിന് പ്രസിഡന്റിന്റെ ചുമതല നല്‍കി. അവിശ്വാസത്തിലൂടെ പ്രസിഡന്റ് പുറത്തായത് സംബന്ധിച്ച് ജില്ലാ വരണാധികാരിക്ക് റിപ്പോര്‍ട്ട് സമര്‍പ്പിക്കും. തുടര്‍ന്ന് സംസ്ഥാന തെരഞ്ഞെടുപ്പ് കമ്മിഷന്റെ നിര്‍ദേശപ്രകാരം പുതിയ പ്രസിഡന്റിനെ തെരഞ്ഞെടുക്കുന്നതിന് വോട്ടെടുപ്പ് നടക്കും. 

The UDF successfully passed a no-confidence motion in Uduma, resulting in the CPM losing the panchayat president's post. The development marks a significant political setback for the CPM in the local body and is expected to influence the political dynamics in the region.