ദുബൈ: യു.എ.ഇയിൽ ഇന്ന് താപനില 48 ഡിഗ്രി സെൽഷ്യസ് വരെ ഉയരുമെന്ന് ദേശീയ കാലാവസ്ഥാ കേന്ദ്രം (NCM) അറിയിച്ചു. രാജ്യത്തിന്റെ ഭൂരിഭാഗം പ്രദേശങ്ങളിലും പൊതുവെ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥയായിരിക്കുമെന്നും വൈകുന്നേരത്തോടെ കിഴക്കൻ മേഖലകളിൽ സംവഹന മേഘങ്ങൾ രൂപപ്പെടുകയും ഒറ്റപ്പെട്ട മഴയ്ക്ക് സാധ്യതയുണ്ടാകുമെന്നും അധികൃതർ അറിയിച്ചു.

പടിഞ്ഞാറൻ തീരപ്രദേശങ്ങളിൽ ഇന്ന് രാത്രിയും നാളെ രാവിലെയും ഈർപ്പമുള്ള കാലാവസ്ഥ അനുഭവപ്പെടും. തെക്കുപടിഞ്ഞാറൻ, വടക്കുപടിഞ്ഞാറൻ ദിശകളിൽ നിന്ന് മണിക്കൂറിൽ 35 കിലോമീറ്റർ വരെ വേഗത്തിൽ വീശുന്ന കാറ്റ് ചില സമയങ്ങളിൽ ശക്തമാകാനും സാധ്യതയുണ്ട്.

അറബിക്കടലിലും ഒമാൻ കടലിലും ഇന്ന് പൊതുവെ കടൽ ശാന്തമായിരിക്കുമെങ്കിലും, നാളെ രാവിലെയോടെ ഒമാൻ കടലിന്റെ തീരത്തിന് അകലെയുള്ള ഭാഗങ്ങളിൽ കടൽ പ്രക്ഷുബ്ധമാകാൻ സാധ്യതയുണ്ടെന്ന് കാലാവസ്ഥാ കേന്ദ്രം അറിയിച്ചു.

ഉൾനാടൻ മേഖലകളിൽ 43 മുതൽ 48 ഡിഗ്രി സെൽഷ്യസ് വരെയും, തീരപ്രദേശങ്ങളിലും ദ്വീപുകളിലും 38 മുതൽ 42 ഡിഗ്രി സെൽഷ്യസ് വരെയും, മലനിരകളിൽ 32 മുതൽ 37 ഡിഗ്രി സെൽഷ്യസ് വരെയും പരമാവധി താപനില രേഖപ്പെടുത്തുമെന്നാണ് പ്രവചനം.

 തുടർദിവസങ്ങളിലും കടുത്ത ചൂട് തുടരുമെന്നാണ് വിലയിരുത്തൽ. നാളെ താപനില വീണ്ടും ഉയരാനിടയുണ്ട്. കിഴക്കൻ, തെക്കൻ മേഖലകളിൽ സംവഹന മേഘങ്ങൾ രൂപപ്പെടുകയും ചിലയിടങ്ങളിൽ പ്രാദേശിക മഴ ലഭിക്കാനും സാധ്യതയുണ്ട്. തെക്കുകിഴക്കൻ, വടക്കുകിഴക്കൻ കാറ്റ് മണിക്കൂറിൽ 40 കിലോമീറ്റർ വരെ ശക്തമാകുകയും തുറസ്സായ പ്രദേശങ്ങളിൽ പൊടിക്കാറ്റിന് ഇടയാക്കുകയും ചെയ്യും.

വ്യാഴാഴ്ചയും സമാന സാഹചര്യമാണ് പ്രതീക്ഷിക്കുന്നത്. കിഴക്കൻ, തെക്കൻ മേഖലകളിൽ മഴമേഘങ്ങൾ രൂപപ്പെടാനും ഒറ്റപ്പെട്ട മഴ ലഭിക്കാനും സാധ്യതയുണ്ട്. വെള്ളിയാഴ്ചയും ശനിയാഴ്ചയും പൊതുവെ തെളിഞ്ഞതോ ഭാഗികമായി മേഘാവൃതമായതോ ആയ കാലാവസ്ഥ തുടരുമെങ്കിലും, കിഴക്കൻ മേഖലകളിൽ മേഘവികാസം ഉണ്ടാകും. താപനിലയിൽ കാര്യമായ മാറ്റമുണ്ടാകില്ല.

ശനിയാഴ്ച രാത്രി മുതൽ ഞായറാഴ്ച രാവിലെ വരെ ചില തീരപ്രദേശങ്ങളിൽ വീണ്ടും ഈർപ്പമുള്ള കാലാവസ്ഥയും മൂടൽമഞ്ഞിനും സാധ്യതയുണ്ടെന്നും ദേശീയ കാലാവസ്ഥാ കേന്ദ്രം അറിയിച്ചു.

English summary :

The UAE is expected to experience extremely hot weather this week, with temperatures reaching up to 48°C on Tuesday, according to the National Centre of Meteorology (NCM). While most areas will remain fair to partly cloudy, eastern and southern regions could see convective clouds and isolated rainfall. Hot conditions are expected to persist through the week, accompanied by occasional strong winds, blowing dust, and humid nights in some coastal areas.