ഷാര്‍ജ: 2026ലെ ആദ്യ ആറുമാസത്തെ സാമ്പത്തിക ഫലങ്ങളില്‍ മികച്ച പ്രകടനം രേഖപ്പെടുത്തി ഷാര്‍ജ ഇസ്‌ലാമിക് ബാങ്ക്. അര്‍ധവാര്‍ഷിക കണക്കുകള്‍ പ്രകാരം ബാങ്കിന്റെ അറ്റലാഭം 803.9 ദശലക്ഷം ദിര്‍ഹമായി (ഏകദേശം 80.39 കോടി ദിര്‍ഹം). കഴിഞ്ഞ വര്‍ഷം ഇതേ കാലയളവില്‍ നേടിയ 697.2 ദശലക്ഷം ദിര്‍ഹവുമായി താരതമ്യം ചെയ്യുമ്പോള്‍ 15.3 ശതമാനമാണ് വളര്‍ച്ച.

ബാങ്കിന്റെ ആകെ പ്രവര്‍ത്തന വരുമാനത്തിലും ഗണ്യമായ വര്‍ധനവുണ്ടായി. വരുമാനം 20.5 ശതമാനം ഉയര്‍ന്ന് 1.4 ബില്യണ്‍ ദിര്‍ഹത്തിലെത്തി. ഇസ്‌ലാമിക് ധനസഹായ പ്രവര്‍ത്തനങ്ങള്‍, സുകൂക്ക് നിക്ഷേപങ്ങള്‍, മറ്റ് ബാങ്കിങ് സേവനങ്ങളില്‍ നിന്നുള്ള വരുമാന വര്‍ധന എന്നിവയാണ് മികച്ച പ്രകടനത്തിന് സഹായകമായത്.

അര്‍ധവാര്‍ഷിക കണക്കുകള്‍ പ്രകാരം ഷാര്‍ജ ഇസ്‌ലാമിക് ബാങ്കിന്റെ ആകെ ആസ്തി 94.5 ബില്യണ്‍ ദിര്‍ഹമായി ഉയര്‍ന്നു. ഇസ്‌ലാമിക് ധനസഹായ പോര്‍ട്ട്‌ഫോളിയോ 49.9 ബില്യണ്‍ ദിര്‍ഹമായും ഉപഭോക്തൃ നിക്ഷേപം 59.4 ബില്യണ്‍ ദിര്‍ഹമായും വര്‍ധിച്ചു.

ഓഹരിയുടമകളുടെ മൂലധനത്തിലും ശ്രദ്ധേയമായ വളര്‍ച്ച രേഖപ്പെടുത്തിയതായി ബാങ്ക് അറിയിച്ചു. ഇസ്‌ലാമിക് ബാങ്കിങ് രംഗത്തെ ശക്തമായ വളര്‍ച്ചയും ഉപഭോക്തൃ വിശ്വാസവുമാണ് മികച്ച സാമ്പത്തിക പ്രകടനത്തിന് പിന്നിലെന്നാണ് വിലയിരുത്തല്‍.

English Summary: 
Sharjah Islamic Bank (SIB) recorded a strong financial performance in the first half of 2026, with net profit after tax reaching AED 803.9 million, compared to AED 697.2 million during the same period last year, marking a growth of 15.3%.