ബംഗളൂരു: നഗരത്തിലെ തെരുവ് കച്ചവടക്കാരെ ഒഴിപ്പിക്കുന്ന കര്‍ണാടക സര്‍ക്കാരിന്റെ നടപടിക്കെതിരെ പ്രതിഷേധം ശക്തമാകുന്നു. ഒഴിപ്പിക്കല്‍ നടപടി ഉടന്‍ നിര്‍ത്തിവെക്കുകയും 2014ലെ തെരുവ് കച്ചവടക്കാരുടെ (ജീവനോപാധി സംരക്ഷണവും തെരുവ് കച്ചവട നിയന്ത്രണവും) നിയമം കര്‍ശനമായി നടപ്പാക്കുകയും ചെയ്യണമെന്ന് ആവശ്യപ്പെട്ട് 500ലധികം കലാകാരന്മാരും സാംസ്‌കാരിക പ്രവര്‍ത്തകരും സാമൂഹിക പ്രവര്‍ത്തകരും ഒപ്പിട്ട തുറന്ന കത്ത് സര്‍ക്കാരിന് കൈമാറി.

മുഖ്യമന്ത്രി ഡി.കെ. ശിവകുമാര്‍, നഗരവികസന മന്ത്രി കൃഷ്ണ ബൈര ഗൗഡ, ഗ്രേറ്റര്‍ ബംഗളൂരു അതോറിറ്റി (ജി.ബി.എ.) ചീഫ് കമ്മീഷണര്‍ മഹേശ്വര്‍ റാവു എന്നിവര്‍ക്കാണ് കത്ത് അയച്ചത്. കാല്‍നടയാത്രക്കാര്‍ക്ക് സൗകര്യമൊരുക്കുമെന്ന പേരില്‍ തെരുവ് കച്ചവടക്കാരെ മാത്രം ഒഴിപ്പിക്കുന്നത് നീതീകരിക്കാനാവില്ലെന്ന് കത്തില്‍ പറയുന്നു. ഫുട്പാത്തുകളില്‍ അനധികൃതമായി പാര്‍ക്ക് ചെയ്യുന്ന വാഹനങ്ങള്‍ക്കെതിരെ നടപടി സ്വീകരിക്കാതെ ഉപജീവനത്തിനായി കച്ചവടം നടത്തുന്നവരെ മാത്രം ലക്ഷ്യമിടുന്നതും കത്തില്‍ വിമര്‍ശിക്കുന്നു.

ALSO READ: ഭീഷണിയായ 'ആനപ്പാറ'യ്ക്ക് അന്ത്യം; വര്‍ഷങ്ങളുടെ ആശങ്കയ്ക്ക് വിരാമം

2014ലെ നിയമപ്രകാരം നഗരത്തിലെ തെരുവ് കച്ചവടക്കാരുടെ സമഗ്ര സര്‍വേ പൂര്‍ത്തിയാക്കുകയും കച്ചവട സര്‍ട്ടിഫിക്കറ്റുകള്‍ വിതരണം ചെയ്യുകയും ചെയ്ത ശേഷമേ ഒഴിപ്പിക്കല്‍ നടപടികള്‍ സ്വീകരിക്കാനാകൂ. ടൗണ്‍ വെന്‍ഡിംഗ് കമ്മിറ്റിയുടെ ശുപാര്‍ശയില്ലാതെ ഒരു പ്രദേശത്തെയും 'നോവെന്‍ഡിംഗ് സോണ്‍' ആയി പ്രഖ്യാപിക്കാനാവില്ലെന്നും, 30 ദിവസത്തെ രേഖാമൂലമുള്ള മുന്‍കൂര്‍ നോട്ടീസ് നല്‍കാതെ കച്ചവടക്കാരെ ഒഴിപ്പിക്കുന്നത് നിയമലംഘനമാണെന്നും കത്തില്‍ ചൂണ്ടിക്കാട്ടുന്നു.

പി.എം. സ്വനിധി പദ്ധതിയുടെ കണക്കുപ്രകാരം ബംഗളൂരുവില്‍ ഏകദേശം ഒന്നരലക്ഷം തെരുവ് കച്ചവടക്കാരുണ്ടെന്നും, അവരില്‍ 80,000ത്തിലധികം പേര്‍ പദ്ധതിയിലൂടെ വായ്പ നേടിയിട്ടുണ്ടെന്നും കത്തില്‍ പറയുന്നു. എന്നാല്‍ നഗരത്തില്‍ 27,000 തെരുവ് കച്ചവടക്കാര്‍ മാത്രമാണെന്ന അധികൃതരുടെ അവകാശവാദം ലക്ഷക്കണക്കിന് പാവപ്പെട്ടവരെ നിയമത്തിന്റെ സംരക്ഷണത്തില്‍നിന്ന് പുറത്താക്കാനുള്ള ശ്രമമാണെന്നും ആരോപിക്കുന്നു.

തങ്ങള്‍ കാല്‍നടയാത്രക്കാര്‍ക്ക് അനുകൂലമാണെങ്കിലും അതിനുവേണ്ടി തെരുവ് കച്ചവടക്കാരുടെ ഉപജീവനം തകര്‍ക്കരുതെന്ന് കത്തില്‍ വ്യക്തമാക്കുന്നു. കാല്‍നടയാത്രക്കാരുടെയും തെരുവ് കച്ചവടക്കാരുടെയും അവകാശങ്ങള്‍ ഒരുപോലെ സംരക്ഷിക്കുന്ന നഗരവികസന മാതൃകയാണ് നടപ്പാക്കേണ്ടതെന്നും ആവശ്യപ്പെടുന്നു. തെരുവ് കച്ചവടം രാത്രിയിലും പൊതുഇടങ്ങളെ സജീവമാക്കുന്നതിലൂടെ സ്ത്രീകളുടെ സുരക്ഷ വര്‍ധിപ്പിക്കുമെന്ന് ജസ്റ്റിസ് വര്‍മ്മ കമ്മിറ്റി റിപ്പോര്‍ട്ടും കത്തില്‍ ഉദ്ധരിച്ചിട്ടുണ്ട്.

ചലച്ചിത്ര പ്രവര്‍ത്തക കവിത ലങ്കേഷ്, നടന്‍ പ്രകാശ് രാജ്, എഴുത്തുകാരി വിജയമ്മ, ആര്‍ക്കിടെക്റ്റ് പ്രേം ചന്ദാവര്‍ക്കര്‍, മുതിര്‍ന്ന അഭിഭാഷകന്‍ ബി.ടി. വെങ്കിടേഷ്, യുഎന്‍ പ്രത്യേക പ്രതിനിധി അശ്വിനി കെ.പി. എന്നിവരുള്‍പ്പെടെ നിരവധി പ്രമുഖരും വിവിധ സാമൂഹിക സംഘടനകളും തുറന്ന കത്തില്‍ ഒപ്പുവെച്ചിട്ടുണ്ട്.