തിരുവനന്തപുരം: ദേശാഭിമാനി വാരാന്തപ്പതിപ്പിലെ 'കള്ളന്‍ വിജയന്‍' ലേഖനവിവാദത്തില്‍ നടപടിയുമായി ദേശാഭിമാനി. കെ.ആര്‍. അജയനെ വാരാന്തപ്പതിപ്പിന്റെ ചുമതലയില്‍ നിന്ന് നീക്കി. ടി ചന്ദ്രമോഹനാണ് പകരം ചുമതല. 

അജയനോട് കഴിഞ്ഞ ദിവസം റസിഡന്റ് എഡിറ്റര്‍ വിശദീകരണം തേടിയിരുന്നു. ലേഖനം പ്രസിദ്ധീകരിക്കണമെന്നും തലക്കെട്ട് ഉചിതമാണെന്നും ഉള്ളടക്കം പാര്‍ട്ടി വിരുദ്ധമല്ലെന്നുമാണ് അജയന്‍ വിശദീകരണത്തില്‍ നിലപാട് അറിയിച്ചത്. വിവരം പുറത്തുപോയതുമായി ബന്ധപ്പെട്ട മാനേജ്‌മെന്റ് വിലയിരുത്തലിനുശേഷം വിശദീകരണം തള്ളി ചുമതലയില്‍ നിന്ന് നീക്കാന്‍ എഡിറ്റോറിയല്‍ ബോര്‍ഡ് തീരുമാനിക്കുകയായിരുന്നു. 

വാരാന്തപ്പതിപ്പിന്റെ ആദ്യപേജില്‍ അനുസ്മരണ ലേഖനവും അവസാനത്തെ പേജില്‍ വിവാദ ശീര്‍ഷകത്തിലുള്ള നാടകപ്രവര്‍ത്തകനെക്കുറിച്ചുള്ള ലേഖനവും പ്രസിദ്ധീകരിക്കാനായിരുന്നു തീരുമാനം. എന്നാല്‍, തലക്കെട്ട് തെറ്റായി വ്യാഖ്യാനിക്കപ്പെടാമെന്ന ആശങ്ക എഡിറ്റോറിയല്‍ ചര്‍ച്ചയില്‍ ഉയര്‍ന്നതോടെയാണ് പതിപ്പ് അച്ചടിക്കാതെ മാറ്റിവെക്കുകയും പിന്നീട് വിവാദ ലേഖനം ഒഴിവാക്കുകയും ചെയ്തത്.