അബുദബി: സാദിയാത്ത് ദ്വീപിന്റെ സമഗ്ര മാസ്റ്റർപ്ലാനിന്റെ അവസാന ഘട്ടത്തിന് തുടക്കം കുറിച്ചുകൊണ്ട് 100 ബില്യൺ ദിർഹത്തിന്റെ (ഏകദേശം 2.27 ലക്ഷം കോടി രൂപ) കൂറ്റൻ വാട്ടർഫ്രണ്ട് വികസന പദ്ധതിയായ 'മാർസ അൽ സാദിയാത്ത്' പ്രഖ്യാപിച്ചു. അബുദബി കിരീടാവകാശിയും എക്സിക്യൂട്ടീവ് കൗൺസിൽ ചെയർമാനുമായ ശൈഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാനാണ് പദ്ധതി ഉദ്ഘാടനം ചെയ്തത്.

6.4 ദശലക്ഷം ചതുരശ്ര മീറ്റർ വിസ്തൃതിയിൽ വ്യാപിച്ചുകിടക്കുന്ന ഈ പദ്ധതിയുടെ മാസ്റ്റർ ഡെവലപ്പർ പ്രമുഖ റിയൽ എസ്റ്റേറ്റ് കമ്പനിയായ 'അൽദാർ' (Aldar) ആണ്.

പ്രധാന സവിശേഷതകളും ആകർഷണങ്ങളും

അബുദബിയിലെ ഏറ്റവും വലിയ മറീന: 350-ഓളം ആഡംബര യാച്ചുകളും സെയിലിംഗ് ബോട്ടുകളും നിർത്തിയിടാൻ ശേഷിയുള്ള തലസ്ഥാനത്തെ ഏറ്റവും വലിയ മറീനയാണ് ഇവിടെ ഒരുങ്ങുന്നത്.

തീരദേശ വിസ്തൃതി: 5.6 കിലോമീറ്റർ നീളമുള്ള ബീച്ചുകൾ ഉൾപ്പെടെ ആകെ 8 കിലോമീറ്റർ കടൽത്തീര പ്രദേശം പദ്ധതിയുടെ ഭാഗമാണ്.

താമസ സൗകര്യങ്ങൾ: സ്വകാര്യ വില്ലകൾ, സീഫ്രണ്ട് അപ്പാർട്ടുമെന്റുകൾ, ബ്രാൻഡഡ് വസതികൾ എന്നിവ ഉൾപ്പെടെ 58,000-ത്തിലധികം ആളുകൾക്ക് താമസിക്കാനാകുന്ന അന്തരീക്ഷം ഇവിടെ സജ്ജീകരിക്കും.

കലാ-സാംസ്കാരിക കേന്ദ്രം: 6,000 പേർക്ക് ഒരുമിച്ച് പങ്കാളികളാകാൻ കഴിയുന്ന പെർഫോമിംഗ് ആർട്സ് തിയേറ്റർ ഇവിടെ സ്ഥാപിക്കും. കൂടാതെ ലൂവ്രെ അബുദാബി, സായിദ് നാഷണൽ മ്യൂസിയം എന്നിവ സ്ഥിതി ചെയ്യുന്ന സാദിയാത്ത് സാംസ്കാരിക ജില്ലയുമായി ഇത് നേരിട്ട് ബന്ധിപ്പിക്കും.

അടിസ്ഥാന സൗകര്യങ്ങൾ: 140 കിലോമീറ്റർ നടപ്പാതകൾ, 46 കിലോമീറ്റർ സൈക്ലിംഗ് ട്രാക്കുകൾ, 3 അത്യാധുനിക സ്‌കൂളുകൾ, പാർക്കുകൾ, സ്പോർട്സ് കോർട്ടുകൾ എന്നിവയും സജ്ജമാക്കും.

ഗതാഗത സംവിധാനങ്ങളും കണക്റ്റിവിറ്റിയും

അബുദബി നഗരമധ്യവുമായുള്ള യാത്രാസമയം കുറയ്ക്കുന്നതിനായി ഉമ്മു യിഫീന ദ്വീപ്, റീം ദ്വീപ് എന്നിവയെ ബന്ധിപ്പിച്ച് പുതിയ റോഡുകളും ടണലുകളും നിർമ്മിക്കും. കൂടാതെ, ഇത്തിഹാദ് റെയിലിന്റെ അതിവേഗ പാസഞ്ചർ ട്രെയിനുകൾക്കായി പദ്ധതി പ്രദേശത്ത് ഒരു ഭൂഗർഭ സ്റ്റേഷനും  വരുന്നുണ്ട്.

നിർമ്മാണവും വിൽപ്പനയും

പദ്ധതിയുടെ ആദ്യ ഘട്ട ഭവനങ്ങളുടെ വിൽപ്പന 2026-ന്റെ രണ്ടാം പകുതിയിൽ ആരംഭിക്കും. അടിസ്ഥാന സൗകര്യ വികസന പ്രവർത്തനങ്ങൾ മൂന്നാം പാദത്തിൽ ആരംഭിക്കുമെങ്കിലും പദ്ധതി പൂർണ്ണമായി പൂർത്തിയാകുന്ന തീയതി കമ്പനി ഔദ്യോഗികമായി പ്രഖ്യാപിച്ചിട്ടില്ല.

ALSO READ: നഴ്‌സറികളും കിന്റർഗാർട്ടനുകളും സംയോജിപ്പിച്ച് 'ഏർലി ചൈൽഡ്‌ഹുഡ് സെന്ററുകൾ' ആരംഭിക്കാൻ ഷാർജ; പ്രവേശനം 3,004 കുട്ടികൾക്ക്

Sheikh Khaled has launched a landmark Abu Dhabi development featuring housing for 58,000 residents, an 8-kilometre coastline, and modern infrastructure to support sustainable urban growth and tourism.