ന്യൂയോര്‍ക്: സിറിയന്‍ പ്രശ്‌നപരിഹാരത്തിന് കടുത്തനയതന്ത്രം വേണമെന്ന് യു.എസ് പ്രസിഡന്റ് ബരാക് ഒബാമ. യു.എന്‍ പൊതുസഭയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

സിറിയന്‍ പ്രതിസന്ധി പരിഹരിക്കാന്‍ ഒബാമ എല്ലാ രാജ്യങ്ങളുടെയും പിന്തുണയും അഭ്യര്‍ഥിച്ചു. അഭയാര്‍ഥി പ്രശ്‌നവും കാലാവസ്ഥാ വ്യതിയാനവുമാണ് ലോകം നേരിടുന്ന ഏറ്റവും വലിയ വെല്ലുവിളി.

കുട്ടികളെ മതവും മാത്സും ഒന്നിച്ചു പഠിപ്പിക്കണം. മതസ്ഥാപനങ്ങള്‍ കുട്ടികളില്‍ സഹിഷ്ണുത പകര്‍ന്നുനല്‍കണം. എല്ലാമതങ്ങളെയും സംസ്‌കാരങ്ങളെയും ഉള്‍ക്കൊള്ളാനും സാമൂഹിക നീതിയും മനുഷ്യാവകാശവും ഉയര്‍ത്തിപിടിക്കാനും കുട്ടികളെ പഠിപ്പിക്കണമെന്ന് അദ്ദേഹം പറഞ്ഞു.

ദേശീയതയുടെ നാശം, അസഹിഷ്ണുത, ഒറ്റപ്പെടുത്തല്‍ എന്നിവ രാജ്യങ്ങള്‍ നേരിടുന്ന വെല്ലുവിളിയാണ്. തന്റെ ഭരണകാലത്ത് സുരക്ഷ വര്‍ധിപ്പിക്കാന്‍ കഴിഞ്ഞുവെന്ന് ഒബാമ പറഞ്ഞു. അമേരിക്ക എപ്പോഴും നല്ലതിനു വേണ്ടി പ്രവര്‍ത്തിക്കുന്ന ശക്തിയാണ്. ആണവ വ്യാപനവും സികാ വൈറസും വെല്ലുവിളിയാണെന്ന് ഒബാമ പറഞ്ഞു. ദക്ഷിണ ചൈനാ കടല്‍ വിഷയവും പ്രവാചകനെ അവഹേളിക്കുന്ന കാര്‍ട്ടൂണ്‍ പ്രസിദ്ധീകരിച്ച സംഭവത്തിലെ പ്രതിഷേധത്തെയും ഒബാമ എടുത്തു പറഞ്ഞു.

ചരിത്രത്തിലാദ്യമായി അഭയാര്‍ഥികളുടെയും കുടിയേറ്റക്കാരുടെയും പ്രശ്‌നങ്ങള്‍ ചര്‍ച്ച ചെയ്യുന്നതിനുള്ള പ്രത്യേക യോഗം സമ്മേളനത്തില്‍ ഉള്‍പ്പെടുത്തിയിരുന്നു.