വടക്കാഞ്ചേരി: മദ്യലഹരിയിലെത്തിയ വയോധികന്റെ ആക്രമണത്തിന് ഇരയായി കയ്യൊടിഞ്ഞ് ചികിത്സയില്‍ കഴിയുന്ന വിധവയായ വീട്ടമ്മയെ അനില്‍ അക്കര എം.എല്‍.എ സന്ദര്‍ശിച്ചു. കൂലിവേല ചെയ്ത് കുടുംബം പുലര്‍ത്തുന്ന പുത്തൂരം വീട്ടില്‍ പരേതനായ ഗോപിയുടെ ഭാര്യ സുഭദ്ര (55)ക്കാണ് മര്‍ദനമേറ്റിരുന്നത്.
വീട്ടമ്മ വീടിന് മുന്നില്‍ ഇരിക്കുമ്പോള്‍ മദ്യ ലഹരിയിലെത്തിയ സുബ്രഹ്മണ്യന്‍ ഇവരെ അസഭ്യം പറയുകയും, തെറി പറയുന്നത് നിര്‍ത്തണമെന്ന് ആവശ്യപ്പെട്ടപ്പോള്‍ ആക്രമിക്കുകയുമായിരുന്നു.
ഈ കേസില്‍ അയല്‍വാസി ഏറത്ത് വീട്ടില്‍ സുബ്രഹ്മണ്യനെ വടക്കാഞ്ചേരി പൊലിസ് നേരത്തെ അറസ്റ്റ് ചെയ്യുകയും കോടതി റിമാന്‍ഡ് ചെയ്യുകയും ചെയ്തിരുന്നു. കോണ്‍ഗ്രസ് മണ്ഡലം പ്രസിഡന്റ് പി.വി നാരായണസ്വാമി, നേതാക്കളായ ഒ.ആര്‍ രാമചന്ദ്രന്‍, എ.എച്ച് സുലൈമാന്‍ എന്നിവരും എം.എല്‍.എയോടൊപ്പം ഉണ്ടായിരുന്നു.