മലപ്പുറം: പ്രധാനമന്ത്രി നരേന്ദ്രമോഡി ഇന്നു കോഴിക്കോട് എത്തുന്നതുമായി ബന്ധപ്പെട്ടു ജില്ലയില്‍ സുരക്ഷാക്രമീകരണത്തിന്റെ ഒരുക്കങ്ങള്‍ ജില്ലാകലക്ടര്‍ എ.ഷൈനമോളുടെ നേതൃത്വത്തില്‍ യോഗം ചേര്‍ന്നു വിലയിരുത്തി. പ്രധാനമന്ത്രി ഇന്നു വൈകുന്നേരം 4.25നു കരിപ്പൂര്‍ എയര്‍പോര്‍ട്ടിലെത്തും. നാളെ വൈകിട്ട് 5.45നു തിരിച്ചുള്ള യാത്രയും ഉണ്ടാവും. ഇതിനോടനുബന്ധിച്ചു നടത്തേണ്ട സുരക്ഷാ ക്രമീകരണങ്ങള്‍ യോഗം ചര്‍ച്ച ചെയ്തു. ഹെലികോപ്റ്റര്‍ മാര്‍ഗമാണു കോഴിക്കോട്ടേക്കുള്ള യാത്രയുണ്ടാവുക. യാത്ര റോഡിലൂടെയാണങ്കില്‍ ആവശ്യമായ ബാരിക്കേഡുകള്‍ തയാറാക്കിയിട്ടുണ്ട്. മറ്റു വകുപ്പുകളുടെ പ്രവര്‍ത്തനങ്ങളും യോഗം വിലയിരുത്തി.
കലക്ടറേറ്റില്‍ ചേര്‍ന്ന യോഗത്തില്‍ എ.ഡി.എം.പി.സെയ്യിദലി, സബ് കലക്ടര്‍ പി.എം ജയമാലിക്, ഡെപ്യൂട്ടി കലക്ടര്‍മാരായ വി.രാമചന്ദ്രന്‍, ഡോ. ജെ.യു.അരുണ്‍ തുടങ്ങിയവര്‍ പങ്കെടുത്തു.