കുന്നുംകൈ: വീട്ടു മുറ്റത്തു പൂച്ചയെ വിഴുങ്ങിയ നിലയില്‍ കണ്ടെത്തിയ പെരുമ്പാമ്പ് പരിഭ്രാന്തി പരത്തി. കുന്നുംകൈ ശിഹാബ് തങ്ങള്‍ നഗറിലെ കെ ശാദുലി ഹാജിയുടെ വീടിന്റെ സമീപത്താണ് ഏഴടിയോളം നീളമുള്ള പെരുമ്പാമ്പിനെ കണ്ടെത്തിയത്. ഇന്നലെ  രാവിലെ എട്ടിനാണു പൂച്ചയെ വിഴുങ്ങിയ നിലയില്‍ പാമ്പിനെ കണ്ടത്.
നാട്ടുകാര്‍ വനം വകുപ്പ് അധികൃതരെ വിവരമറിയിക്കുകയും നാട്ടുകാരുടെ സഹായത്തോടെ  പെരുമ്പാമ്പിനെ ചാക്കിലാക്കി  പ്ലാച്ചിക്കര ഫോറസ്റ്റില്‍ അഴിച്ചു വിടുകയും ചെയ്തു. കഴിഞ്ഞ ആറു മാസത്തിനിടെ ഇതു മൂന്നാം തവണയാണ് ഈ പ്രദേശത്ത് പെരുമ്പാമ്പിനെ കാണുന്നത്.
ഒരു മാസം മുമ്പ്  കൂട്ടില്‍ നിന്ന് ആടിനെ വിഴുങ്ങിയ നിലയില്‍ കണ്ടെത്തിയ പെരുമ്പാമ്പിനെ വനപാലകര്‍ പിടിച്ചു കൊണ്ടു പോയിരുന്നു. ചൈത്രവാഹിനി പുഴയുടെ തീരത്ത് താമസിക്കുന്ന വീടുകളിലാണ് അധികവും ഇത്തരം പാമ്പുകള്‍ ചേക്കേറുന്നത്.
തുടര്‍ച്ചയായി പാമ്പുകളെ കാണപ്പെടുന്നതിനാല്‍ പ്രദേശവാസികള്‍ പരിഭ്രാന്തിയിലാണ്.