തിരുവനന്തപുരം: ശ്രീമതി ടീച്ചര്‍ തന്റെ മരുമകളെ നിയമിച്ചത് പാര്‍ട്ടി അറിഞ്ഞു കൊണ്ടല്ലെന്ന് മുഖ്യമന്ത്രി. മകന്റെ നിയമന വിവാദം കത്തുന്നതിനിടെ മരുമകളുടെ നിയമനത്തില്‍ വിശദീകരണവുമായി ശ്രീമതി ടീച്ചര്‍ ഫെയ്‌സ്ബുക്കില്‍ പോസ്റ്റ് ചെയ്തിരുന്നു.

പത്തു വര്‍ഷം മുമ്പ് തന്റെ മരുമകളെ പേഴ്‌സനല്‍ സ്റ്റാഫില്‍ അംഗമാക്കിയത് പാര്‍ട്ടിയുടെ അറിവോടെയാണെന്ന വാക്കുകളെ തള്ളിയിരിക്കുകയാണ് മുഖ്യമന്ത്രി പിണറായി വിജയന്‍. അന്ന് പാര്‍ട്ടി സെക്രട്ടറിയായിരുന്നു പിണറായി വിജയന്‍. അന്ന് നിയമിക്കുമ്പോള്‍ പാര്‍ട്ടി സെക്രട്ടറിയായിരുന്ന പിണറായി വിജയന്റെ അനുവാദം വാങ്ങിയിരുന്നെന്നും പോസ്റ്റില്‍വ്യക്തമാക്കുന്നു. എന്നാല്‍, ഈ വാക്കുകളെ ഖണ്ഡിച്ചു കൊണ്ടാണ് മുഖ്യമന്ത്രി ഇപ്പോള്‍ രംഗത്തെത്തിയത്.

മന്ത്രി ഭവനത്തില്‍ പേഴ്‌സനല്‍ സ്റ്റാഫിലെ മൂന്ന് അംഗങ്ങളെ നിയമിക്കാനുള്ള അധികാരം ഓരോ മന്ത്രിക്കുമുണ്ട്. ഇത് പാര്‍ട്ടി അറിയണമെന്ന് നിര്‍ബന്ധമില്ല. ഇതു പ്രകാരം ശ്രീമതി ടീച്ചര്‍ മരുമകളെ നിയമിച്ചത് പാര്‍ട്ടി അറിഞ്ഞിട്ടില്ല. എന്നാല്‍, സ്ഥാനക്കയറ്റത്തിനായി അപേക്ഷിച്ചപ്പോള്‍ പാര്‍ട്ടി അതിനെ കുറിച്ച് അന്വേഷിക്കുകയും രാജിവയ്പ്പിക്കുകയും ചെയ്യുകയായിരുന്നുവെന്ന് മുഖ്യമന്ത്രി പറഞ്ഞു.