ന്യൂഡല്‍ഹി: പാകിസ്താന്‍ ഇന്ത്യയിലേക്കുള്ള വിമാന സര്‍വീസുകള്‍ വെട്ടിക്കുറിച്ചു. കറാച്ചിയില്‍നിന്നും ഡല്‍ഹിയിലേക്കും മുംബൈയിലേക്കുമുള്ള പാകിസ്താന്‍ എയര്‍ലൈന്‍സിന്റെ സര്‍വീസുകളാണ് വെട്ടിച്ചുരുക്കിയത്.

മോശം കാലാവസ്ഥമൂലവും ഉറി ഭീകരാക്രമണത്തിനു ശേഷം യാത്രക്കാരുടെ എണ്ണത്തില്‍ കുറവ് വന്നതിലുമാണ് സര്‍വീസുകള്‍ നിര്‍ത്തലാക്കിയതെന്നാണ് സൂചന. എന്നാല്‍ ലാഹോറില്‍നിന്നും ഡല്‍ഹിയിലേക്കുള്ള സര്‍വീസുകള്‍ സാധാരണ പോലെ സര്‍വ്വീസ് നടത്തും.

റദ്ദാക്കിയ വിമാനത്തിലെ യാത്രക്കാര്‍ക്ക് പാക് എയര്‍ലൈന്‍സിന്റെ മറ്റു വിമാനങ്ങളില്‍ യാത്ര ചെയ്യാനുള്ള സൗകര്യമൊരുക്കിയിട്ടുണ്ട്. ഇതുമായി ബന്ധപ്പെട്ടുള്ള സംശയങ്ങള്‍ക്ക് ഡല്‍ഹി, മുംബൈ എന്നിവിടങ്ങളിലെ പാക് എയര്‍ലൈന്‍സ് ഓഫീസുമായി ബന്ധപ്പെടണമെന്ന് അധികൃതര്‍ അറിയിച്ചു.

അതേസമയം ഇന്ത്യയില്‍നിന്ന് പാകിസ്താനിലേക്ക് വിമാനങ്ങള്‍ ഒന്നും തന്നെ സര്‍വീസ് നടത്തുന്നില്ല. ഇരു രാജ്യങ്ങളിലേക്കും നേരിട്ട് സര്‍വ്വീസ് നടത്തുന്നത് പാകിസ്താന്‍ എയര്‍ലൈന്‍സ് മാത്രമാണ്. ആഴ്ച്ചയില്‍ അഞ്ച് സര്‍വ്വീസുകളാണ് ഇതിന് ഇന്ത്യയിലേക്കുള്ളത്.