കല്‍പ്പറ്റ: ജില്ലയില്‍ 'ആശിക്കും ഭൂമി ആദിവാസിക്ക്' പദ്ധതി പ്രകാരം വാങ്ങിയ ഭൂമിയില്‍ വ്യാപകമായ തിരിമറി നടന്നെന്ന് ഐ.സി ബാലകൃഷണന്‍ എം.എല്‍.എയുടെ അന്വേഷണറിപ്പോര്‍ട്ട്. റിപ്പോര്‍ട്ട് കെ.പി.സി.സി അധ്യക്ഷന്‍ വി.എം സുധീരന് നല്‍കി. ആദിവാസി ഭൂമി ഇടപാടില്‍ വ്യാപകതട്ടിപ്പ് നടന്നുവെന്ന മാധ്യമ വാര്‍ത്തകളുടെ അടിസ്ഥാനത്തിലാണ് കെ.പി.സി.സി അന്വേഷണ കമ്മിഷനെ നിയോഗിച്ചത്. ആശിക്കും ഭൂമി ആദിവാസിക്ക് പദ്ധതി പ്രകാരം കഴിഞ്ഞ സര്‍ക്കാരിന്റെ കാലത്ത് ആദിവാസികള്‍ക്കു വാങ്ങി നല്‍കിയ ഭൂമികളെല്ലാംതന്നെ ഉപയോഗയോഗ്യമല്ല എന്നതാണ് ഐ.സി ബാലകൃഷ്ണന്‍ കെ.പി.സി.സിക്ക് നല്‍കിയ റിപ്പോര്‍ട്ടിന്റെ കാതല്‍.
തവിഞ്ഞാല്‍ പഞ്ചായത്തിലെ വെണ്‍മണിയില്‍ സെന്റിന് 5,000 രൂപവച്ചു നല്‍കി സ്വകാര്യവ്യക്തി വാങ്ങിയ ഭൂമി 26,500 രൂപക്ക് സര്‍ക്കാര്‍ എടുത്തതില്‍ ക്രമക്കേടുണ്ട്. വഴി സൗകര്യമില്ലാത്ത ഈ ഭൂമി ഇടപാടില്‍ മാത്രം കോടികള്‍ സര്‍ക്കാരിനു നഷ്ടമായിട്ടുണ്ടെന്ന് റിപ്പോര്‍ട്ടില്‍ പരാമര്‍ശമുണ്ട്. പല ആദിവാസികള്‍ക്കും ഇപ്പോഴും ഇങ്ങനെ ഭൂമിയുണ്ടെന്ന വിവരം പോലുമറിയില്ലെന്നും റിപ്പോര്‍ട്ടില്‍ പറയുന്നു. ഉദയഗിരികുന്നിനുമുകളില്‍ അരിവാള്‍ രോഗികള്‍ക്ക് വാങ്ങിയ തേയിലത്തോട്ടം 2005ല്‍ ഉരുള്‍പൊട്ടലുണ്ടായ സ്ഥലമാണ്. നിരന്തരം രാസകീടനാശിനികള്‍ പ്രയോഗിക്കുന്ന തേയിലത്തോട്ടം പോലുള്ള സ്ഥലങ്ങള്‍ അരിവാള്‍ രോഗികളുടെ ആരോഗ്യത്തെ ബാധിക്കുമെന്ന കാര്യം പോലും ജില്ലാ കലക്‌റുടെ നേതൃത്വത്തിലുള്ള ഭൂമിയെടുപ്പുസമിതി ശ്രദ്ധിച്ചില്ല. മാനന്തവാടി ബ്ലോക്ക് പ്രസിഡന്റായിരുന്ന എം.ജി ബിജുവിന്റെ വാര്‍ഡിലാണ് എറ്റവുമധികം തട്ടിപ്പുനടന്ന ഈ രണ്ടുഭൂമിയുമെന്നും റിപ്പേര്‍ട്ടില്‍ പരാമര്‍ശിക്കുന്നുണ്ട്. വ്യാപക ക്രമക്കേടുകള്‍ ശ്രദ്ധയില്‍പ്പെട്ടതിന്റെ അടിസ്ഥാനത്തില്‍ കെ.പി.സി.സി സമിതി അന്വേഷിക്കുകയോ വിജിലന്‍സ് അന്വേഷണത്തിന് ശുപാര്‍ശചെയ്യുകയോ ചെയ്യണമെന്ന് ആവശ്യപ്പെട്ടാണ് റിപ്പോര്‍ട്ട് അവസാനിക്കുന്നത്.