കോഴിക്കോട്: 1984ലെ ട്രെയ്‌നിങ് ബാച്ചില്‍ നിന്ന് തുടങ്ങിയതാണ് അജയകുമാറിന്റെയും റോയ് ജോസഫിന്റേയും സൗഹൃദം. ഈ വര്‍ഷം സംസ്ഥാന പൊലിസ് കായികമേളയ്ക്കായി മെഡിക്കല്‍ കോളജ് സിന്തറ്റിക് ട്രാക്കിലെത്തിയപ്പോഴും അതിന് ഒട്ടും മങ്ങലേറ്റിട്ടില്ല. അവരുടെ റെക്കോര്‍ഡുകള്‍ക്കും. 200 മീറ്ററില്‍ റോയ് ജോസഫിന്റെ പേരിലും ഹൈജംപില്‍ അജയകുമാറിന്റെ പേരിലുമാണ് നിലവിലുള്ള റെക്കോര്‍ഡ്. വര്‍ഷങ്ങള്‍ക്ക് മുന്‍പ് ഇവരിട്ട റെക്കോര്‍ഡ് ഇതുവരെ ആരും തിരുത്തിയിട്ടില്ല.
തങ്ങളുടെ റെക്കോര്‍ഡ് ആരെങ്കിലും തിരുത്തുന്നുണ്ടോ എന്നു നോക്കുന്നതിനൊപ്പം പഴയ ബാച്ചിന്റെ ഓര്‍മകള്‍ അയവിറക്കാനും മേളയ്ക്കിടെ സമയം കണ്ടെത്തുന്നുണ്ട് ഈ എസ്.പിയും ഡി.വൈ.എസ്.പിയും. 2.01 മീറ്റര്‍ ഉയരത്തില്‍ ചാടിയാണ് അജയകുമാര്‍ നാഷനല്‍ പൊലിസ് മീറ്റില്‍ റെക്കോര്‍ഡിട്ടതെങ്കില്‍ റോയിയുടെ റെക്കോര്‍ഡ് പൊലിസ് സ്റ്റേറ്റ് അത്‌ലറ്റിക് മീറ്റിലാണ്. 21.09 സെക്കന്‍ഡില്‍ ഓടിയെത്തിയാണ് റോയ് റെക്കോര്‍ഡിട്ടത്.
വേള്‍ഡ് പൊലിസ് മീറ്റിലും നാഷനല്‍ ഗെയിംസിലും ഇരുവര്‍ക്കും മെഡല്‍ ലഭിച്ചിട്ടുണ്ട്. കോതമംഗലം സ്വദേശിയായ റോയ് പി. ജോസഫ് ഇപ്പോള്‍ കണ്ണൂരില്‍ ഡെപ്യൂട്ടി കമാന്‍ഡന്റും അജയകുമാര്‍ തിരുവനന്തപുരത്ത് അസി. കമാന്‍ഡന്റുമാണ്. അടുത്ത കായികമേളയിലും തങ്ങളുടെ സൗഹൃദവും റെക്കോര്‍ഡും ഇതുപോലെ നിലനില്‍ക്കുമെന്ന പ്രതീക്ഷയിലാണ് ആദ്യദിന മത്സരത്തിനു ശേഷം ഇരുവരും മടങ്ങിയത്.