ചിറ്റഗോങ്: ഇംഗ്ലണ്ടും ബംഗ്ലാദേശും തമ്മിലുള്ള ഒന്നാം ക്രിക്കറ്റ് ടെസ്റ്റ് അവേശകരമായ അന്ത്യത്തിലേക്ക്. ഒരു ദിവസം അവശേഷിക്കെ ഇരു ടീമുകള്‍ക്കും വിജയ സാധ്യത. രണ്ടു വിക്കറ്റുകള്‍ കൈയിലിരിക്കേ ബംഗ്ലാദേശിനു വിജയിക്കാന്‍ 33 റണ്‍സ് വേണം. രണ്ടാം ഇന്നിങ്‌സില്‍ ഇംഗ്ലണ്ടിനെ 240 റണ്‍സില്‍ പുറത്താക്കിയ ബംഗ്ലാദേശ്  286 റണ്‍സ് വിജയ ലക്ഷ്യത്തിലേക്ക് ബാറ്റു വീശുന്നു. നാലാം ദിനം അവസാനിക്കുമ്പോള്‍ അവര്‍ എട്ടു വിക്കറ്റ് നഷ്ടത്തില്‍ 253 റണ്‍സെന്ന നിലയിലാണ്. ഇംഗ്ലണ്ട് ആദ്യ ഇന്നിങ്‌സില്‍ 293ഉം ബംഗ്ലാദേശ് 248ഉം റണ്‍സാണെടുത്തത്.
ബംഗ്ലാ നിരയില്‍ സബ്ബിര്‍ റഹ്മാന്‍ 59 റണ്‍സുമായി പുറത്താകാതെ നില്‍ക്കുന്നു. ഒപ്പം 11 റണ്‍സുമായി തൈജുല്‍ ഇസ്‌ലാമാണ് ക്രീസില്‍. ഇംഗ്ലണ്ടിനായി ബാറ്റി മൂന്നും മൊയിന്‍ അലി, ബ്രോഡ് എന്നിവര്‍ രണ്ടു വിക്കറ്റെടുത്തു.
നേരത്തെ എട്ടു വിക്കറ്റ് നഷ്ടത്തില്‍ 228 എന്ന നിലയില്‍ നാലം ദിനം ബാറ്റിങ് പുനഃരാരംഭിച്ച ഇംഗ്ലണ്ടണ്ടിനെ അഞ്ചു വിക്കറ്റ് നേടിയ ഷക്കിബ് അല്‍ ഹസനാണ് തകര്‍ത്തത്.  ഒരു ഘട്ടത്തില്‍ അഞ്ചിനു 62 എന്ന നിലയില്‍ പതറിയ ഇംഗ്ലണ്ടിനെ 85 റണ്‍സ് നേടിയ ബെന്‍ സ്റ്റോക്‌സാണ് കരകയറ്റിയത്. സ്റ്റോക്‌സിനു പുറമേ 47 റണ്‍സ് നേടി ജോണി ബെയര്‍‌സ്റ്റോയും തിളങ്ങി.