വെള്ളറട: കെ.എസ്.ആര്‍.ടി.സി ഡിപ്പോയ്ക്കുള്ളില്‍ക്കയറി കണ്ടക്ടറെ മര്‍ദിച്ചതില്‍ പ്രതിഷേധിച്ച് സമരം. കഴിഞ്ഞദിവസമാണ് ബൈക്കിലെത്തിയ എസ്.എഫ്.ഐ വിദ്യാര്‍ഥികള്‍ കണ്ടക്ടര്‍ എന്‍.എ ലിയോണിനെ മര്‍ദിച്ചത്. അക്രമികളെ അറസ്റ്റ് ചെയ്യുമെന്ന് പൊലിസ് അറിയിച്ചിരുന്നുവെങ്കിലും ആരും പിടിയിലായില്ല. കെ.എസ്.ആര്‍.ടി.സി സംയുക്ത ട്രേഡ് യൂനിയനാണ് പണിമുടക്കുന്നത്.
ബസുകളെല്ലാം ആനപ്പാറ വര്‍ക്‌ഷോപ്പില്‍ നിര്‍ത്തിയിട്ടിരിക്കുന്നു. സ്‌കൂള്‍, കോളജ് വിദ്യാര്‍ഥികളെ യാത്രികരെയും സമരം വലച്ചു. കണ്‍സഷനുമായി എത്തിയ വിദ്യാര്‍ഥികള്‍ റോഡുവക്കില്‍ വെള്ളറട ടൗണില്‍ നിസഹായരായി.
എസ്.എഫ്.ഐ പ്രവര്‍ത്തകരായതുകൊണ്ടാണ് പൊലിസ് അക്രമികളെ പിടികൂടാത്തതെന്് ഡിപ്പോ ജീവനക്കാര്‍ ആരോപിച്ചു. കഴിഞ്ഞദിവസം തിരുവനന്തപുരത്തുനിന്ന് വെള്ളറടയിലേക്കു രാത്രി സര്‍വിസ് നടത്തവെ എസ്.എഫ്.ഐ വിദ്യാര്‍ഥികള്‍ കണ്‍സഷന്‍ പതിക്കാതെ കണ്ടക്ടര്‍ ലിയോണിനെ ശല്യം ചെയ്തതിനാല്‍ ഇവരെ മലയിന്‍കീഴ് പൊലിസ് അറസ്റ്റുചെയ്തിരുന്നു. തുടര്‍ന്ന് ബസ് വെള്ളറട ഡിപ്പോയ്ക്കുള്ളില്‍ എത്തിയ ഉടന്‍ പിന്തുടര്‍ന്നെത്തിയവരാണ് കണ്ടക്ടറെ അടിച്ചുവീഴ്ത്തിയത്.
കെ.എസ്.ആര്‍.ടി.സി ഉന്നതാധികാരികള്‍ വെള്ളറടയിലെത്തി പണിമുടക്കിയ ജീവനക്കാരുമായി ചര്‍ച്ച നടത്തി. കണ്ടക്ടറെ മര്‍ദിച്ചവര്‍ക്കെതിരേ കേസെടുത്തിട്ടുണ്ടെന്നും ഉടന്‍ അറസ്റ്റിലാകുമെന്നും സി.ഐ അനില്‍കുമാര്‍ പറഞ്ഞു.
ഇന്നലെ രാവിലെ രണ്ട് കണ്ടക്ടര്‍മാര്‍ ജോലിക്കുള്ള കാര്‍ഡ് വാങ്ങിയിരുന്നു. അവര്‍ മാത്രം സര്‍വിസ് നടത്തിയാല്‍ മതിയെന്നു ചര്‍ച്ചയില്‍ പങ്കെടുക്കുന്ന ഉന്നതാധികൃതര്‍ അറിയിച്ചിരുന്നു. സമരം ചെയ്തവര്‍ക്കു ശിക്ഷാനടപടികള്‍ സ്വീകരിക്കാനുള്ള നടപടിയുടെ മുന്നോടിയാകാം ഇതെന്നു തൊഴിലാളികള്‍ സംശയിക്കുന്നു.