കോഴിക്കോട്: മുഹമ്മദ് റഫിയുടെ ഓര്‍മകള്‍ നെഞ്ചിലേറ്റി കല്ലായിപ്പുഴയുടെ തീരത്ത് നിന്ന് മകന്‍ ഷാഹിദ് റഫി ഗാനമാലപിച്ചപ്പോള്‍ ശ്രോതാക്കളുടെ കണ്ണുകള്‍ ഈറനണിഞ്ഞു.
വിനീഷ് മില്ലേനിയം രചനയും സംവിധാനവും നിര്‍വഹിക്കുന്ന 'കല്ലായ് എഫ്.എം' ചിത്രത്തില്‍ പ്രധാന വേഷം ചെയ്യാനെത്തിയതാണ് റഫിയുടെ ഇളയമകന്‍ ഷാഹിദ് റഫി. മുഹമ്മദ് റഫി പ്രേമിയുടെ കഥ പറയുന്ന ചിത്രത്തില്‍ പിതാവ് റഫിയായിട്ടാണ് ഷാഹിദ് അഭിനയിക്കുന്നത്. കോഴിക്കോട്, മുംബൈ, അബൂദബി തുടങ്ങിയ സ്ഥലങ്ങളില്‍ ചിത്രീകരണം പൂര്‍ത്തിയാക്കുന്ന ചിത്രത്തില്‍ മറ്റൊരു പ്രധാന കഥാപാത്രത്തെ അവതരിപ്പിക്കുന്നത് ശ്രീനിവാസനാണ്.