അഗളി: അട്ടപ്പാടിയിലെ ദേശസാല്‍കൃത ബാങ്കുകളില്‍ കഴിഞ്ഞ രണ്ടുദിവസം കൊണ്ടെത്തിയത് 20 കോടിയുടെ നോട്ടുകള്‍. മറ്റു പ്രദേശങ്ങളെ അപേക്ഷിച്ച് പണം നിക്ഷേപിക്കാനാണ് ആദിവാസികളടക്കമുള്ളവര്‍ ഇവിടെ എത്തിയത്.
രാവിലെ ആറു മുതല്‍ ആദിവാസി സ്ത്രീകളുടെ ക്യൂ ബാങ്കുകള്‍ക്ക് മുന്നിലുണ്ടായിരുന്നു. ഇവിടത്തെ ജനസംഖ്യയില്‍ 40 ശതമാനം പേരും ആദിവാസികളാണ്. നിക്ഷേപിക്കാനെത്തിയത് വിവിധ പദ്ധതികളിലായി ലഭിച്ച പണം സ്വരൂപിച്ചുവച്ചതാണെന്ന് പറയുന്നുണ്ടെങ്കിലും ആദിവാസികളെ കള്ളപ്പണം വെളുപ്പിക്കാനായി ഉപയോഗിക്കുന്നുണ്ടെന്ന സംശയമുയര്‍ന്നിട്ടുണ്ട്. 10,000 മുതല്‍ ലക്ഷങ്ങള്‍ വരെ നിക്ഷേപിച്ച ആദിവാസികളുണ്ടിവിടെ. ആദിവാസികള്‍ക്കുപുറമെ തമിഴ് കുടിയേറ്റക്കാരുടെ ക്യൂവും ബാങ്കുകള്‍ക്കു മുന്നിലുണ്ടായിരുന്നു. രാത്രി ഏഴു വരെ ബാങ്കുകള്‍ പ്രവര്‍ത്തിക്കുന്നുമുണ്ട്. കോടിക്കണക്കിന് രൂപയാണ് അട്ടപ്പാടിയില്‍ ആദിവാസി വികസനത്തിനായി സര്‍ക്കാരുകള്‍  ചെലവിട്ടുകൊണ്ടിരിക്കുന്നത്. എന്നാല്‍ ഇതിന്റെയൊന്നും ഗുണം ആദിവാസികള്‍ക്ക് കിട്ടാറില്ല.