കോഴിക്കോട്: തെരുവുനായ ശല്യത്തിനെതിരേയുള്ള അധികാരികളുടെ നിലപാടില്‍ പ്രതിഷേധിച്ച് മിമിക്രി കലാകരനും ഗായകനുമായ തൃശൂര്‍ നസീര്‍ പാട്ടിലൂടെ ബോധവല്‍ക്കരണവുമായി രംഗത്ത്. 13ന് മാനാഞ്ചിറ മൈതാനിയില്‍ ഉച്ചമുതല്‍ രാത്രി എട്ടരവരെയാണ് പരിപാടി സംഘടിപ്പിക്കുന്നത്. പരിപാടിയില്‍ 300ഓളം മലയാളം, ഹിന്ദി, തമിഴ് ഗാനങ്ങള്‍ മൗത്ത് ഓര്‍ഗനിലൂടെയും വോക്കലില്‍ കൂടിയും വായിക്കും. തുടര്‍ന്നു മിമിക്രിയും അവതരിപ്പിക്കും.
തെരുവുനായ ശല്യത്തിനെതിരേ ജനങ്ങള്‍ക്ക് ബോധവല്‍ക്കരണം നല്‍കുന്നതിനായാണ് പരിപാടി സംഘടിപ്പിക്കുന്നതെന്ന് തൃശൂര്‍ നസീര്‍ പത്രസമ്മേളനത്തില്‍ പറഞ്ഞു.
വൈകിട്ട് ആറിന് നടക്കുന്ന സമാപന പരിപാടിയില്‍ കലാകായിക, സാംസ്‌കാരിക, രാഷ്ട്രീയ രംഗത്തെ പ്രമുഖര്‍ പങ്കെടുക്കും. തെരുവുനായ വിഷയത്തില്‍ മേനകാഗാന്ധിയുടെ നടപടികളോടുള്ള പ്രതിഷേധ സൂചകമായി 50 തെരുവുനായക്കളെ മേനകാഗാന്ധിക്ക് സമ്മാനമായി നല്‍കും. ഇതിനായി ഡിസംബര്‍ 18ന് സംസ്ഥാനത്തുനിന്ന് നായകളുമായി വാഹനം പുറപ്പെടുമെന്നും ഡിസംബര്‍ 25ന് മേനകാഗാന്ധിയുടെ വസതിയുടെ മുന്‍പില്‍ കലാപരിപാടികള്‍ അവതരിപ്പിക്കുമെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു.