മഞ്ചേരി: കാട്ടാനക്കൂട്ടങ്ങളെ തുരത്താന്‍ പിതാവ് ഉണ്ടാക്കിയ ഏറുമാടത്തിന്റെ മാതൃക സ്‌കൂള്‍ ശാസ്‌ത്രോത്സവത്തില്‍ അവതരിപ്പിച്ച് പ്ലസ്‌വണ്‍ വിദ്യാര്‍ഥി. മരുത മഞ്ചക്കോട് സ്വദേശിയും നാരോക്കാവ് എന്‍.എച്ച്.എസ്.എസ് ഹയര്‍സെക്കന്‍ഡറി സ്‌കൂള്‍ പ്ലസ്‌വണ്‍ വിദ്യാര്‍ഥിയുമായ ആഷിഖാണ് പിതാവില്‍ നിന്നും പ്രചോദനം ഉള്‍കൊണ്ട് മുളകൊണ്ടുള്ള ഏറുമാടമുണ്ടാക്കിയത്. മരുത കൊടമണിക്കോട് ഫോറസ്റ്റിനു സമീപമാണ് ഈ വിദ്യാര്‍ഥിയും കുടുംബവും താമസിക്കുന്നത്. പിതാവ് തച്ചറാവില്‍ അബൂബക്കര്‍ വീടിനടുത്ത് കാട്ടാനകളുടെ ശല്യത്തില്‍ നിന്നു രക്ഷനേടാന്‍ വിശാലമായ ഏറുമാടം ഉണ്ടാക്കിയിട്ടുണ്ട്. അതേ മാതൃകയിലാണ് ആഷിഖ് ഇന്നലെ സ്‌കൂള്‍ ശാസ്‌ത്രോത്സവത്തില്‍ ബാംബു മോഡല്‍ മത്സരത്തില്‍ കൗതുകം ജനിപ്പിച്ച് ഏറുമാടമൊരുക്കിയത്. ഒറ്റ മുളയിലാണ് ഏറുമാടത്തിന്റെ നിര്‍മാണം.