പൊന്നാനി: മത്സ്യബന്ധനത്തിനായി പുറപ്പെട്ട ബോട്ട് മണല്‍തിട്ടയിലിടിച്ചു പൂര്‍ണമായി തകര്‍ന്നു. പൊന്നാനി തുറമുഖത്ത് ഇന്നലെ പുലര്‍ച്ചയാണ് അപകടമുണ്ടായത്. ഏഴു തൊഴിലാളികളുമായി പുറപ്പെട്ട അഴീക്കല്‍ സ്വദേശി മുസ്താരിയുടെ ഇല്യാസ് ബോട്ടാണ് തകര്‍ന്നത്. മണല്‍തിട്ടയിലിടിച്ച ബോട്ട് ആടിയുലഞ്ഞു പുലിമുട്ടിലിടിച്ചു തകരുകയായിരുന്നു. ബോട്ടിലുണ്ടായിരുന്നവര്‍ നീന്തി രക്ഷപ്പെട്ടു. തുടര്‍ന്നു മറ്റു ബോട്ടുകളെത്തിയാണ് തൊഴിലാളികളെ രക്ഷിച്ചു കരയ്‌ക്കെത്തിച്ചത്. പൂര്‍ണമായും തകര്‍ന്ന ബോട്ട് തിരച്ചിലിനു ശേഷം കണ്ടെത്തി അവശിഷ്ടങ്ങള്‍ കരയ്‌ക്കെത്തിച്ചു.
ട്രോളിങ് നിരോധനത്തിനു ശേഷം പൊന്നാനി അഴിമുഖത്തു രണ്ടാം തവണയാണ് മണല്‍തിട്ടയിലിടിച്ച് ബോട്ട് തകരുന്നത്. ബോട്ടിന്റെ എന്‍ജിനുള്‍പ്പെടുന്ന വിലപിടിപ്പുള്ള ഭാഗങ്ങള്‍ കണ്ടെടുക്കാനാകാത്തതിനാല്‍ ലക്ഷങ്ങളുടെ നഷ്ടമാണുണ്ടായത്.