പേരാമ്പ്ര: ടൗണില്‍ വെള്ളിയാഴ്ച പുലര്‍ച്ചെ നാലോടെ വന്‍ തണല്‍മരം കടപുഴകി വീണ് ഏഴോളം കടകള്‍ തകര്‍ന്നു. മാര്‍ക്കറ്റ് പൈതോത്ത് റോഡ് പരിസരത്ത് വൈദ്യുതി മുടങ്ങുകയും പേരാമ്പ്ര ടൗണില്‍ ഗതാഗതക്കുരുക്കും അനുഭവപ്പെട്ടു. പൈതോത്ത് റോഡില്‍ നിര്‍മാണത്തിലിരിക്കുന്ന കമ്മ്യൂണിറ്റി ഹാള്‍ കെട്ടിടത്തോടു ചേര്‍ന്ന മരമാണ് എതിര്‍വശത്തുള്ള കെട്ടിടത്തിലേക്ക് കടപുഴകി വീണത്. കഴിഞ്ഞ കുറച്ചു ദിവസങ്ങളായി ഈ മേഖലയില്‍ കനത്ത മഴ പെയ്യുന്നതും കമ്മ്യൂണിറ്റി ഹാളിന്റെ ഫില്ലര്‍ നിര്‍മാണത്തിനായി കുഴിയെടുത്തപ്പോള്‍ മരത്തിന്റെ വേരുകള്‍ മുറിച്ചുമാറ്റിയതുമാണ് അപകടത്തിന് വഴിയൊരുക്കിയത്.
കാലപ്പഴക്കമുള്ള കെട്ടിടത്തില്‍ പ്രവര്‍ത്തിക്കുന്ന ചായക്കട, മരുതോറ അമ്മതിന്റെ ഉടമസ്ഥതയിലുള്ള സ്റ്റേഷനറി കട, മഠത്തുമ്പടി മൊയ്തീന്‍ ഹാജിയുടെ മലഞ്ചരക്ക് കട, പി.എന്‍.ബി സൈക്കിള്‍ മാര്‍ട്ട്, നീലോത്ത് മീത്തല്‍ ശശിയുടെ ബാര്‍ബര്‍ ഷോപ്പ്, ഒഴിച്ചിട്ട ടൈലറിങ് ഷോപ്പും മറ്റൊരു മുറി എന്നിവക്കാണ് കേടുപാടുകള്‍ സംഭവിച്ചത്. പേരാമ്പ്ര സ്വദേശി വിളയാട്ടുകണ്ടി മുഹമ്മദിന്റെ ഉടമസ്ഥതയിലുള്ളതാണ് തകര്‍ന്ന കെട്ടിടം. കെട്ടിടത്തിന്റെ കഴുക്കോലും ഓടുകളും തകര്‍ന്നിട്ടുണ്ട്. വൈദ്യുതി ബന്ധം രാത്രിയായിട്ടും പുനഃസ്ഥാപിച്ചിട്ടില്ല.