തിരുവനന്തപുരം: വ്യാജ ഏറ്റുമുട്ടലിനെതിരായ സാംസ്‌കാരിക പരിപാടിക്ക് പൊലീസ് ഇടപെട്ട് വേദി നിഷേധിച്ചതായി പരാതി. ജനാധിപത്യത്തിലെ വ്യാജ ഏറ്റുമുട്ടലുകള്‍ എന്ന പേരില്‍ ഇടത് സംഘടന മൂവ്‌മെന്റ് ഫോര്‍ ഡെമോക്രാറ്റിക് റൈറ്റ്‌സാണ് പരിപാടി സംഘടിപ്പിച്ചത്.

പൊലീസ് ഭീഷണിയെത്തുടര്‍ന്ന് പരിപാടിയില്‍ പങ്കെടുക്കേണ്ട സാംസ്‌കാരിക പ്രവര്‍ത്തകര്‍ പിന്‍മാറിയതായും ആരോപണം.ഇന്ന് വൈകീട്ട് അഞ്ച് മണിക്ക് തിരുവനന്തപുരം വെറ്റിനറി ഹാളിലാണ് പരിപാടി നിശ്ചയിച്ചിരുന്നത്.

ജനാധിപത്യത്തിലെ വ്യാജ ഏറ്റുമുട്ടല്‍ എന്ന പേരില്‍ മൂവ്‌മെന്റ് ഫോര്‍ ഡെമോക്രാറ്റിക് റൈറ്റ്‌സ് എന്ന ഇടത് അനുകൂല സാംസ്‌കാരിക സംഘടനയാണ് കണ്‍വെന്‍ഷന്‍ നടത്താന്‍ തീരുമാനിച്ചത്. നേരത്തെ അനുമതി നല്‍കിയ ഹാള്‍ അധികൃതര്‍ പക്ഷേ പിന്നീട് പിന്മാറി. ഇതിന് കാരണം പൊലീസ് ഇടപെടലാണെന്നാണ് ആരോപണം.

പൊലീസ് ഭീഷണിയെത്തുടര്‍ന്ന് പരിപാടിയില്‍ പങ്കെടുക്കാമെന്നേറ്റ സാംസ്‌കാരിക പ്രവര്‍ത്തകര്‍ പിന്മാറിയതായും സംഘാടകര്‍ ആരോപിച്ചു. പരിപാടി പിന്നീട് സ്‌പെന്‍സര്‍ ജങ്ഷന് അടുത്തുള്ള സക്രീം ഹാളിലേക്ക് മാറ്റിയെങ്കിലും അവര്‍ക്കെതിരെ ഭീഷണി ഉയര്‍ന്നതായും ആരോപണമുണ്ട്.