ശാസ്താംകോട്ട: കുന്നത്തൂര്‍ താലൂക്കിലെ വരള്‍ച്ചാ ബാധിതപ്രദേശങ്ങളില്‍ കുടിവെള്ളമെത്തിക്കുന്നതിന് കിയോസ്‌ക്ക് സംവിധാനം വഴി നടപടിസ്വീകരിക്കണമെന്ന് റവന്യൂവകുപ്പിന് നിര്‍ദ്ദേശം.
വരള്‍ച്ചയെ നേരിടുന്നതിന് വേണ്ടി സംസ്ഥാന സര്‍ക്കാര്‍ നടപ്പിലാക്കുന്ന പദ്ധതിയുമായി ബന്ധപ്പെട്ട് കോവൂര്‍കുഞ്ഞുമോന്‍ എം.എല്‍.എയുടെ അധ്യക്ഷതയില്‍ താലൂക്ക ്‌കോണ്‍ഫറന്‍സ് ഹാളില്‍ ചേര്‍ന്ന യോഗത്തിലാണ് നിര്‍ദേശം നല്‍കിയത്.
ഡെപ്യൂട്ടി കലക്ടര്‍(എല്‍.ആര്‍), തഹസില്‍ദാര്‍, വാട്ടര്‍ അതോറിറ്റി എക്‌സി. എന്‍ജിനിയര്‍, വില്ലേജ് ഓഫിസര്‍മാര്‍, പഞ്ചായത്ത് പ്രസിഡന്റുമാര്‍, ബി.ഡി.ഒ, വകുപ്പ ് മേധാവികള്‍ എന്നിവരുടെ സംയുക്തയോഗത്തിലാണ് നിര്‍ദേശം ഉയര്‍ന്നത്.
ജലസ്രോതസുകളില്‍നിന്നുള്ള ജലലഭ്യത കുറഞ്ഞിരിക്കുന്നതിനാല്‍ ചെറുകിടപദ്ധതികളില്‍ സംഭവിച്ചിട്ടുള്ള ചെറിയ തകരാറുകള്‍ പരിഹരിച്ച് കുടിവെള്ളമെത്തിക്കുന്നതിനുള്ള സത്വര നടപടിയുണ്ടാകണമെന്ന് യോഗം ആവശ്യപ്പെട്ടു. അഞ്ചു വര്‍ഷം കൊണ്ട് സംസ്ഥാനത്തെ കുടിവെള്ള ക്ഷാമത്തിന് ശ്വാശ്വതപരിഹാരം കാണുന്നതിനുള്ള നടപടികളുടെ ഭാഗമായി വാര്‍ഡുതലത്തില്‍ കുടിവെള്ള പദ്ധതികള്‍ തയ്യാറാക്കി സംസ്ഥാനസര്‍ക്കാരിന് സമയബന്ധിതമായി സമര്‍പ്പിക്കുവാന്‍ ബന്ധപ്പെട്ട വകുപ്പിന് നിര്‍ദ്ദേശവും നല്‍കി. കനാലുകള്‍ വൃത്തിയാക്കുന്നതിന് പഞ്ചായത്തുകള്‍ മുന്‍കൈയെടുക്കണമെന്നും കുടിവെള്ള ക്ഷാമംനേരിടുന്ന അവസരത്തില്‍ പൈപ്പ്‌പൊട്ടി ജലംപാഴാകുന്നത് പരിഹരിക്കാന്‍ അടിയന്തിരനടപടിസ്വീകരിക്കണമെന്നും യോഗം നിര്‍ദേശിച്ചു.