തൊടുപുഴ: തൊമ്മന്‍കുത്തില്‍ നിന്നും ഗൂണ്ടാ-ക്വട്ടേഷന്‍ സംഘത്തെ മല്‍പിടുത്തത്തിലൂടെ പൊലിസ് പിടികൂടി. തിരുവനന്തപുരത്തുനിന്നും എത്തിയ ആന്റി ഗുണ്ടാ സ്‌ക്വാഡും ജില്ലാ പൊലിസ് മേധാവി എ.വി ജോര്‍ജിന്റെ ഹൈറേഞ്ച് സ്‌പൈഡേഴ്‌സും ചേര്‍ന്നാണ് പ്രതികളെ കീഴടക്കിയത്. തിരുവനന്തപുരം സ്വദേശികളായ ടിനി ബാബു(41), അജേഷ് (41), ഉണ്ണികൃഷണന്‍ നായര്‍(41) എന്നിവരാണ് അറസ്റ്റിലായത്.
കഴിഞ്ഞദിവസം പുലര്‍ച്ചെ രണ്ടിന് നടത്തിയ മിന്നല്‍നീക്കത്തിലൂടെ മല്‍പിടുത്തത്തിലൂടെയാണ് പ്രതികളെ പൊലിസ് കീഴടക്കിയത്. സമീപകാലത്ത് തിരുവനന്തപുരത്ത് നടന്ന വിഷ്ണു വധക്കേസിലെ പ്രതികളാണിവരെന്ന് പൊലിസ് പറഞ്ഞു. ഇവരെക്കുറിച്ചുള്ള കൂടുതല്‍ വിവരങ്ങള്‍ പുറത്ത് വിട്ടിട്ടില്ല. പിടികൂടിയ പ്രതികളെ തിരവനന്തപുരത്ത് എത്തിച്ചു. പ്രതികള്‍ തൊടുപുഴ തൊമ്മന്‍കുത്തിനു സമീപത്തുള്ള കൊലക്കേസില്‍ ശിക്ഷിക്കപ്പെട്ടയാളുടെ വീട്ടില്‍ ഒളിവില്‍ താമസിക്കുന്നതായി പൊലിസിനു വിവരം ലഭിച്ചിരുന്നു. മൊബൈല്‍ ഫോണ്‍ ടവര്‍ ലൊക്കേഷന്‍ കേന്ദ്രീകരിച്ച് നടത്തിയ അന്വേഷണത്തിലാണ് പ്രതികള്‍ വലയിലായത്.