കോവളം: സമൂഹത്തില്‍ അസഹിഷ്ണുതയും ക്രിമിനല്‍ സ്വഭാവവും വര്‍ധിച്ചുവരുന്നതായും ഇതിനെതിരേ ജാഗ്രത പുലര്‍ത്തണമെന്നും കേരളാ ഗവര്‍ണര്‍ ജസ്റ്റിസ് പി. സദാശിവം.
കോവളത്ത് നടക്കുന്ന 45ാമത് അഖിലേന്ത്യാ പൊലിസ് സയന്‍സ് കോണ്‍ഗ്രസിന്റെ സമാപനസമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സൈബര്‍ കുറ്റകൃത്യങ്ങള്‍ വര്‍ധിക്കുന്നത് തടയാന്‍ പൊലിസ് സേനയ്ക്ക് കഴിയണമെന്ന് അദ്ദേഹം അഭിപ്രായപ്പെട്ടു. ബ്യൂറോ ഓഫ് പൊലിസ് റിസര്‍ച്ച് ആന്റ്  ഡവലപ്‌മെന്റ് ഡയറക്ടര്‍ ജനറല്‍ എം.സി.ബോര്‍വാന്‍കര്‍, എ.ഡി.ജി.പി പര്‍വേസ് ഹയാത്ത്, എ.ഡി.ജി.പി ബി.സന്ധ്യ, പി.എസ്.സി ചെയര്‍മാന്‍ ശശി എന്നിവര്‍ സംസാരിച്ചു.
പൊലിസ് പ്രവര്‍ത്തനങ്ങളുമായി ബന്ധപ്പെട്ട നവീന ശാസ്ത്ര സാങ്കേതിക മാര്‍ഗങ്ങള്‍ പരിചയപ്പെടുത്തുന്നതിനും ചര്‍ച്ച ചെയ്യുന്നതിനും ബ്യൂറോ ഓഫ് പൊലിസ്് റിസര്‍ച്ച് ആന്റ് ഡവലപ്‌മെന്റാണ് എല്ലാ വര്‍ഷവും സയന്‍സ് കോണ്‍ഗ്രസ് സംഘടിപ്പിക്കുന്നത്.