കണ്ണൂര്‍: ദേശീയപാത പള്ളിക്കുന്നില്‍ ഡിവൈഡറിലിടിച്ച് വീണ്ടും വാഹനാപകടം. ഇന്നലെ രാത്രി ഒന്‍പതോടെ വനിതാ കോളജിനു സമീപമാണ് തളിപ്പറമ്പ് ഭാഗത്തു നിന്നു തലശ്ശേരിയിലേക്കു പോവുകയായിരുന്ന കാര്‍ ഡിവൈഡറില്‍ ഇടിച്ചതിനു ശേഷം ലോറിക്കും മറ്റൊരു കാറിനും കൂട്ടിയിടിച്ചത്.
അപകടത്തില്‍ സ്ത്രീ ഉള്‍പ്പെടെ രണ്ടു പേര്‍ക്കു പരുക്കേറ്റു. തലശ്ശേരി തിരുവങ്ങാട് സ്വദേശികളായ പത്മരാജന്‍ (40), അഞ്ജന(34) എന്നിവര്‍ക്കാണ് പരുക്കേറ്റത്. ഇവരെ കണ്ണൂര്‍ എ.കെ.ജി ആശുപത്രിയില്‍ പ്രവേശിപ്പിച്ചു.
ഒരേ ദിശയിലേക്കു പോവുകയായിരുന്ന മൂന്ന് വാഹനങ്ങളാണ് അപകടത്തില്‍പ്പെട്ടത്. പരുക്കേറ്റവര്‍ സഞ്ചരിച്ചിരുന്ന കെ.എല്‍. 13 പി 6226 സാന്‍ട്രോ കാര്‍ ആദ്യം ഡിവൈഡറില്‍ ഇടിച്ച ശേഷം നിയന്ത്രണം വിട്ട് ലോറിയിലും പിന്നീട് മലപ്പുറം സ്വദേശികള്‍ സഞ്ചരിച്ച കെ.എല്‍ 10 എ.പി 8033 കാറിലും ഇടിക്കുകയായിരുന്നു.
ഇടിയുടെ ആഘാതത്തില്‍ മലപ്പുറം സ്വദേശികള്‍ സഞ്ചരിച്ച കാറിന്റെ പിന്‍ഭാഗത്തെ ഗ്ലാസ് പൂര്‍ണമായും തകര്‍ന്നു. ലോറി നിര്‍ത്താതെ പോവുകയായിരുന്നു. പരുക്കേറ്റവരെ ഓടിക്കൂടിയവരാണ് ആശുപത്രിയിലെത്തിച്ചത്.
കഴിഞ്ഞ ഏതാനും ദിവസങ്ങളായി ദേശീയപാത പുതിയതെരു-പള്ളിക്കുന്ന് ഭാഗങ്ങളില്‍ സ്ഥാപിച്ച ഡിവൈഡറുകളില്‍ തട്ടി വാഹനങ്ങള്‍ അപകടത്തില്‍പ്പെടുകയാണ്. റിഫഌക്ടറുകളോ മറ്റ് ഫഌറസന്റ് ലൈറ്റുകളോ ഇല്ലാതെയാണ് മിക്ക ഡിവൈഡറുകളുമുള്ളത്. ഇതിന്റെ അരികുകള്‍ കാണാത്തതിനാല്‍ ഡിവൈഡറുകളുടെ മുകളിലേക്കു കയറിയാണ് ഭൂരിഭാഗം വാഹനങ്ങളും അപകടത്തില്‍പെടുന്നത്.