കാഞ്ഞങ്ങാട് : ഈ വര്‍ഷത്തെ സപ്തദിന എന്‍.എസ്.എസ് ക്യാംപുകളില്‍ ഗ്രീന്‍ എര്‍ത്തിന്റെ 'മധുരം കുഞ്ഞുകൈകളാല്‍' പദ്ധതി നടക്കും. ഈ മാസം 25 ന് ദുര്‍ഗ്ഗാ ഹയര്‍ സെക്കന്‍ഡറി സ്‌കൂള്‍ എന്‍.എസ്.എസ് വിദ്യാര്‍ഥികളുമായി സഹകരിച്ചു പദ്ധതിയുടെ ഉദ്ഘാടനം നടക്കും.
രാവിലെ ഇരിയ ഗവ. ഹയര്‍ സെക്കന്‍ഡറി സ്‌കൂളിലാണ് ഉദ്ഘാടനം. ക്യാംപു നടക്കുന്ന പ്രദേശങ്ങളിലെ വീടുകളിലെ കുഞ്ഞുങ്ങളെക്കൊണ്ട് ഗ്രീന്‍ എര്‍ത്ത് പ്രവര്‍ത്തകരോടൊപ്പം എന്‍.എസ്.എസ് വിദ്യാര്‍ഥികള്‍ ഫലവൃക്ഷതൈകള്‍ നടുന്നതാണു പദ്ധതി. തുടര്‍ന്നു 26 നു മരക്കാപ്പ് കടപ്പുറം ഗവ. ഹയര്‍സെക്കന്‍ഡറി സ്‌കൂളില്‍ ചായ്യോത്ത് എന്‍.എസ്.എസ് വിദ്യാര്‍ഥികളോടൊപ്പവും 28നു പെരിയ ഹയര്‍ സെക്കന്‍ഡറി സ്‌കൂളില്‍ നെഹ്‌റു കോളജ് എന്‍.എസ്.എസ് വിദ്യാര്‍ഥികളോടൊപ്പവും 29നു തൃക്കരിപ്പൂര്‍ നടക്കാവ് സ്‌കൂളില്‍ ഇക്ബാല്‍ ഹയര്‍ സെക്കന്‍ഡറി സ്‌കൂളിലെ എന്‍.എസ്.എസ് വിദ്യാര്‍ഥികളോടൊപ്പവും പദ്ധതി നടക്കും.
എല്ലാ മസവും വിവിധ സ്‌കൂളുകളിലെയും കോളജുകളിലെയും എന്‍.എസ്.എസുമായി സഹകരിച്ചു 'മധുരം കുഞ്ഞുകൈകളാല്‍' പദ്ധതി നടക്കും. വനവല്‍ക്കരണവുമായി ബന്ധപ്പെട്ട് ഗ്രീന്‍ എര്‍ത്തിന്റെ അഞ്ചാമത്തെ പദ്ധതിയാണിത്.