തലയോലപ്പറമ്പ്: ഒടുവില്‍ മാത്യു വധക്കേസിന്റെ ചുരുളഴിയുന്നു. കഴിഞ്ഞ എട്ടുദിവസങ്ങളായി പൊലിസ് നടത്തിയ അന്വേഷണത്തിനൊടുവില്‍ മാത്യുവിന്റെ കൈയുടേതെന്നു കരുതുന്ന രണ്ട് അസ്ഥി കഷ്ണങ്ങള്‍ കണ്ടെത്തിയതോടെയാണ് അന്വേഷണം വഴിത്തിരിവിലായത്. ഇന്നലെ രാവിലെയും ബഹുനില കെട്ടിടത്തില്‍ കുഴി താഴ്ത്തിയുള്ള പരിശോധന തുടര്‍ന്നിരുന്നു. 9.30ഓടെ രണ്ട് കാലിന്റെയും അസ്ഥികള്‍ ലഭിച്ചു. 10.30ഓടെ വാരിയെല്ലിന്റെ കഷ്ണങ്ങളും ലഭിച്ചു. കാലിന്റെ അസ്ഥിക്കുള്ളില്‍ മജ്ജ ഇപ്പോഴുമുള്ളതിനാല്‍ ഫോറന്‍സിക് പരിശോധനക്ക് വളരെയധികം സഹായകരമാകുമെന്നാണ് പൊലിസിന്റെ വിലയിരുത്തല്‍. മാത്യുവിന്റെ മകള്‍ നൈസിയുടെ രക്തവും ഇന്നലെ ഡി.എന്‍.എ പരിശോധനക്കയച്ചു. തലയോട്ടിക്കുവേണ്ടിയായിരുന്നു ഇന്നലെ പ്രധാനമായും പരിശോധന നടന്നത്. എന്നാല്‍ ഇത് കണ്ടെത്താന്‍ സാധിച്ചില്ല. കെട്ടിടം പണിയാന്‍ ജെ.സി.ബി ഉപയോഗിച്ച് മണ്ണ് നീക്കം ചെയ്തപ്പോള്‍ തലയോട്ടിയുടെ ഭാഗം പൊടിഞ്ഞുപോയിരിക്കാനാണ് സാധ്യതയെന്നാണ് വിലയിരുത്തല്‍.
കൊലപാതകം നടന്ന് ഒന്നര വര്‍ഷത്തിനുശേഷം കുഴിച്ചിട്ട സ്ഥലത്തുനിന്ന് മൃതദേഹത്തിന്റെ ചില അവശിഷ്ടങ്ങള്‍ ചാക്കില്‍കെട്ടി പുഴയില്‍ തള്ളിയതായി പ്രതി അനീഷ് വെളിപ്പെടുത്തിയിരുന്നു. എന്നാല്‍ പൊലിസ് ഇത് പൂര്‍ണമായും വിശ്വസിച്ചിരുന്നില്ല. അവശിഷ്ടങ്ങള്‍ മാറ്റിയപ്പോള്‍ തലയോട്ടിയും ഇവിടെനിന്ന് അനീഷ് കടത്തിയതായുള്ള സംശയവും ബലപ്പെടുന്നുണ്ട്.