ന്യൂഡല്‍ഹി: മൊബൈല്‍ പേയ്‌മെന്റ് കമ്പനിയായ പേടിഎമ്മിന്റെ ഇടപാടുകളില്‍ അപാകതകള്‍ തുടരുന്നു. ബാങ്ക് അക്കൗണ്ടുകളില്‍ നിന്ന് പണം കുറയുന്നുണ്ടെങ്കിലും മൊബൈല്‍ വാലറ്റില്‍ പണം എത്തുന്നില്ലെന്നതാണ് പ്രധാന പരാതി. ഇതു പരിഹരിക്കാന്‍ പേടിഎമ്മിനായിട്ടില്ല.

നിലവിലെ ബാലന്‍സ് അറിയാനും പേടിഎമ്മിലൂടെ സാധിക്കുന്നില്ല. പേടിഎമ്മില്‍ നിന്ന് ബാങ്ക് അക്കൗണ്ടിലേക്കു തന്നെ ബാലന്‍സ് തിരികെയെത്തിക്കാനുള്ള ശ്രമവും പരാജയപ്പെട്ടിരുന്നു. കഴിഞ്ഞ കുറച്ചു ദിവസങ്ങളായി പേടിഎം ഉപയോക്താക്കള്‍ക്ക് ഇങ്ങനെയുള്ള നിരവധി പ്രശ്‌നങ്ങള്‍ നേരിടേണ്ടി വരികയാണ്.

സെര്‍വര്‍ കണക്റ്റിവിറ്റി പ്രശ്‌നങ്ങളാണ് ഇപ്പോഴുള്ള അപാകതകള്‍ക്കു കാരണമെന്നാണ് പേടിഎം അധികൃതര്‍ പറയുന്നത്.

500, 1000 നോട്ടുകള്‍ പിന്‍വലിച്ചതിനെത്തുടര്‍ന്നാണ് ആളുകള്‍ വ്യാപകമായി മൊബൈല്‍ വാലറ്റുകള്‍ ഉപയോഗിക്കാന്‍ തുടങ്ങിയത്. പേടിഎം കമ്പനിയാണ് ഇതില്‍ മുന്നിട്ടുനിന്നത്. മൊബൈല്‍ വാലറ്റുകള്‍ ഉപയോഗിക്കണമെന്ന് സര്‍ക്കാര്‍ തന്നെ നിര്‍ദേശിക്കുകയും സുരക്ഷയുണ്ടെന്ന് ഉറപ്പുനല്‍കുകയും ചെയ്തിരുന്നു. ഇതിന്റെ ഉപയോഗം വ്യാപകമായെങ്കിലും സുരക്ഷയുടെ കാര്യത്തില്‍ ഇപ്പോഴും വ്യക്തത വന്നിട്ടില്ല.