തിരുവനന്തപുരം: 71 ാമത് സന്തോഷ് ട്രോഫിക്കുള്ള കേരള ടീമിനെ പ്രഖ്യാപിച്ചു. പുതുമുഖങ്ങള്‍ ഏറെയുള്ള 20 അംഗ ടീമിന്റെ ക്യാപ്റ്റര്‍ എസ്.ബി.ടി താരം പി. ഉസ്മാനാണ്. മൂന്നു ഘട്ടങ്ങളിലായി നടന്ന സെലക്ഷന്‍ ക്യാംപുകളില്‍ 70 കളിക്കാരില്‍ നിന്നാണ് 20 അംഗ ടീമിനെ തിരഞ്ഞെടുത്തത്. മുന്‍ ഇന്ത്യന്‍ താരം വി.പി ഷാജിയാണു ടീം കോച്ച്. തിരുവനന്തപുരം ജില്ലാ ഫുട്‌ബോള്‍ അസോസിയേഷന്‍ പ്രസിഡന്റ് വി ശിവന്‍കുട്ടിയാണു ടീമിനെ പ്രഖ്യാപിച്ചത്.
19 വയസിനു താഴെയുള്ള ആറു കളിക്കാര്‍ ടീമില്‍ ഇടംപിടിച്ചപ്പോള്‍ 16 കളിക്കാര്‍ 23 വയസിനു താഴെയുള്ളവരാണ്. ജനുവരി അഞ്ചു മുതല്‍ കോഴിക്കോടു വച്ചാണ് യോഗ്യതാ മത്സരങ്ങള്‍ നടക്കുക. ഗ്രൂപ്പ് എ വിഭാഗത്തില്‍ കേരളത്തെ കൂടാതെ കര്‍ണാടക, ആന്ധ്ര പ്രദേശ്, പോണ്ടിച്ചേരി എന്നീ ടീമുകളാണുള്ളത്. ജനുവരി അഞ്ചിനു പോണ്ടിച്ചേരിയുമായാണു കേരളത്തിന്റെ ആദ്യ മത്സരം.
2003ല്‍ കൊച്ചിയില്‍ നടന്ന സന്തോഷ് ട്രോഫിയില്‍ റണ്ണേഴ്‌സ് അപ്പായതിനു ശേഷമുള്ള രണ്ടു വര്‍ഷങ്ങളിലും കേരളം യോഗ്യതാ റൗണ്ട് കടന്നിട്ടില്ല. നാലു തവണ സന്തോഷ് ട്രോഫി കളിച്ച പരിചയ സമ്പത്തുമായാണു മലപ്പുറം കണ്ണന്തളി സ്വദേശി പി ഉസ്മാന്‍ ടീമിനെ നയിക്കുന്നത്. കഴിഞ്ഞ രണ്ടു വര്‍ഷങ്ങളിലും പരുക്ക് മൂലം ടീമില്‍ ഇടം ലഭിച്ചിരുന്നില്ല. പുതമുഖങ്ങളേറെയുള്ള ടീമില്‍ പ്രതീക്ഷയുണ്ടെന്നും യോഗ്യത മത്സരത്തില്‍ കര്‍ണാടകയോടു വിജയിക്കുക എന്നതാണു പ്രധാന വെല്ലുവിളിയെന്നും ഉസ്മാന്‍ പറഞ്ഞു.
കഴിഞ്ഞ വര്‍ഷങ്ങളിലേക്കാള്‍ മറ്റു ടീമുകള്‍ ശക്തരാണെന്നും കേരളത്തിന്റെ കളിക്കാര്‍ക്കു മികച്ച പ്രകടനം കാഴ്ചവയ്ക്കനാകുമെന്നും കോച്ച് വി.പി. ഷാജി പറഞ്ഞു.
തിരുവനന്തപുരത്തു നടന്ന ചടങ്ങില്‍ എസ്.ബി.ടി ജനറല്‍ മാനേജര്‍ (എച്ച്.ആര്‍) സാം കുട്ടി മാത്യൂസ്, കേരള ഫുട്‌ബോള്‍ അസോസിയേഷന്‍ ജനറല്‍ സെക്രട്ടറി പി അനില്‍കുമാര്‍ പങ്കെടുത്തു.
ഗീവര്‍ഗീസാണു ടീം മാനേജര്‍. മില്‍റ്റണ്‍ ആന്റണി അസിസ്റ്റന്റ് കോച്ചും ഫിറോസ് ഷെരീഫ് ഗോള്‍ കീപ്പിങ് കോച്ചുമാണ്. അഷ്‌കറാണ് ടീം ഫിസിയോ.
ടീം
ഗോള്‍ കീപ്പേര്‍മാര്‍- മിഥുന്‍ വി (കണ്ണൂര്‍, എസ്.ബി.ടി തിരുവനന്തപുരം), ഹജ്മല്‍ (പാലക്കാട്, കെ.എസ്.ഇ.ബി തിരുവനന്തപുരം), മെല്‍ബിന്‍ എസ്. (തിരുവനന്തപുരം, കേരള പൊലിസ്).
പ്രതിരോധം- എം. നജേഷ് (കാസര്‍കോട്, വാസ്‌കോ ഗോവ), എസ്. ലിജോ (തിരുവനന്തപുരം, എസ്.ബി.ടി), രാഹുല്‍ വി രാജ് (തൃശൂര്‍, എസ്.ബി.ടി തിരുവനന്തപുരം), കെ. നൗഷാദ് (കോട്ടയം, ബസേലിയസ് കോളജ്), ശ്രീരാഗ് വി.ജി (തൃശൂര്‍, എഫ്.സി കേരള).
മധ്യനിര- എസ്. സീസന്‍ (എസ്.ബി.ടി, തിരുവനന്തപുരം) വി.കെ. ഷിബിന്‍ ലാല്‍ (കോഴിക്കോട്, എസ്.ബി.ടി തിരുവനന്തപുരം), മുഹമ്മദ് പറക്കോട്ടില്‍ (പാലക്കാട്, കെ.എസ്.ഇ.ബി തിരുവനന്തപുരം), ജിഷ്ണു ബാലകൃഷ്ണന്‍ (മലപ്പുറം, എന്‍.എസ്.എസ് കോളജ് മഞ്ചേരി), നെറ്റോ ബെന്നി (ഇടുക്കി, യൂണിറ്റി സോക്കര്‍ തൊടുപുഴ), അനന്തു മുരളി (കോട്ടയം, ബസേലിയസ് കോളജ്), അഷ്‌റുദ്ദീന്‍ (മലപ്പുറം, എസ്.എസ് കോളജ് അരീക്കോട്).
മുന്നേറ്റം- പി ഉസ്മാന്‍ (ക്യാപ്റ്റന്‍, മലപ്പുറം, എസ്.ബി.ടി തിരുവനന്തപുരം), ജോബി ജസ്റ്റിന്‍ (തിരുവനന്തപുരം, കെ.എസ്.ഇ.ബി), എസ് എല്‍ദോസ് ജോര്‍ജ് (ഇടുക്കി, എസ്.ബി.ടി തിരുവനന്തപുരം), ഫിറോസ് കളത്തിങ്കല്‍ ( വൈസ് ക്യാപ്റ്റന്‍, മലപ്പുറം, കേരള പൊലിസ്), സഹല്‍ അബ്ദുല്‍ സമദ് (എസ്.എന്‍ കോളജ് കണ്ണൂര്‍).
റിസര്‍വ്- ഫ്രാന്‍സിസ് (കെ.എസ്.ഇ.ബി തിരുവനന്തപുരം), റിജോണ്‍ ജോസ് (സെന്റ് തോമസ് കോളജ് തൃശൂര്‍), മുഹമ്മദ് റാഫി (സെന്‍ട്രല്‍ എക്‌സൈസ്, കൊച്ചി), എഫ് ജിജോ (എസ്.ബി.ടി തിരുവനന്തപുരം).