മലപ്പുറം: മാജിക്കിനെ സ്‌കൂള്‍ കലോത്സവ മത്സര ഇനമാക്കുന്നതിനെതിരേ മജീഷ്യന്‍ നിലമ്പൂര്‍ പ്രദീപ്കുമാര്‍. ഇതിനെതിരേയുള്ള പരാതി വിദ്യാഭ്യാസ മന്ത്രിയടക്കമുള്ളവര്‍ക്കു നല്‍കിയതായി അദ്ദേഹം വാര്‍ത്താസമ്മേളനത്തില്‍ അറിയിച്ചു.
സര്‍ക്കാര്‍തലത്തില്‍ അനുകൂല തീരുമാനമുണ്ടായില്ലെങ്കില്‍ കോടതിയെ സമീപിക്കും. മാജിക് രഹസ്യ സ്വഭാവം ഉള്ളതാണ്. അത് അവതരിപ്പിക്കാന്‍ കാഴ്ചക്കാരുമായി നിശ്ചിത അകലം ആവശ്യമുള്ളതാണ്. മാജിക്കിലെ തന്ത്രങ്ങള്‍ അടുത്തറിഞ്ഞാല്‍ പിന്നെ ഇതു കണ്ടിരിക്കുന്നതില്‍ അര്‍ഥമില്ല. മാജിക്ക് സ്റ്റേജില്‍ അന്യരെ പ്രവേശിപ്പിക്കുകയോ പിന്നില്‍ നിര്‍ത്തുകയോ ചെയ്യുകയില്ല. യുവജനോത്സവ വേദികളില്‍ ഈ രഹസ്യ സ്വഭാവം സൂക്ഷിക്കാന്‍ കഴിയില്ലെന്നും മാജിക്കിനുവേണ്ടി മാത്രം പ്രത്യേക സ്റ്റേജുണ്ടാക്കി മത്സരം നടത്തുകയാണ് വേണ്ടതെന്നും ഇങ്ങനെ നടത്തിയാല്‍ മാജിക്കിന് കൂടുതല്‍ ജനപ്രീതി ലഭിക്കുമെന്നും അദ്ദേഹം പറഞ്ഞു.