പുതുക്കാട്: കണ്ണിയത്ത് ഉസ്താദിന്റെയും ശംസുല്‍ ഉലമയുടെയും ആണ്ട് നേര്‍ച്ച എസ്.കെ.എസ്.എസ്.എഫ് തൃശൂര്‍ ജില്ലാ കമ്മിറ്റിയുടെ നേതൃത്വത്തില്‍ നാളെ രാവിലെ ഒന്‍പത് മുതല്‍ പാലപ്പിള്ളി പുലിക്കണ്ണി ദാറുത്തഖ്്‌വ ഇസ്്‌ലാമിക് അക്കാദമിയില്‍ നടക്കും. സമസ്ത ട്രഷറര്‍ ജിഫ്്‌രി മുത്തുക്കോയ തങ്ങള്‍ ആണ്ട് നേര്‍ച്ച ഉദ്ഘാടനം ചെയ്യും. സമസ്ത കേന്ദ്ര മുശാവറ അംഗങ്ങളായ മുഹമ്മദ് കോയ ബാ അലവി തങ്ങള്‍ അല്‍ ഹൈദ്രൂസി, ജനറല്‍ സെക്രട്ടറി എം.എം മുഹ്‌യദ്ദീന്‍ മൗലവി എന്നിവര്‍ അനുഗ്രഹ പ്രഭാഷണം നിര്‍വഹിക്കും. ചെറുവാളൂര്‍ ഉസ്താദ് സമാപന പ്രാര്‍ഥനക്ക് നേതൃത്വം നല്‍കും.
എസ്.കെ.എസ്.എസ് എഫ് സംസ്ഥാന വൈസ് പ്രസിഡന്റ് ഓണമ്പിള്ളി മുഹമ്മദ് ഫൈസി, ട്രഷറര്‍ ബഷീര്‍ ഫൈസി ദേശമംഗലം, മുന്‍ ജില്ലാ പ്രസിഡന്റ് അന്‍വര്‍ മുഹ്‌യദ്ദീന്‍ ഹുദവി അനുസ്മരണ പ്രഭാഷണവും ജലീല്‍ റഹ്മാനി വാണിയന്നൂര്‍ മുഖ്യപ്രഭാഷണവും നിര്‍വഹിക്കും. എസ്.കെ.എസ്.എസ്.എഫ് ജില്ലാ പ്രസിഡന്റ് സിദ്ധീഖ് ബദരി, ജനറല്‍ സെക്രട്ടറി ഷെഹീര്‍ ദേശമംഗലം, ട്രഷറര്‍ മഹ്‌റൂഫ് വാഫി കണ്ണിയത്ത് ഉസ്താദ്, ശംസുല്‍ ഉലമ, കോട്ടുമല ഉസ്താദ് എന്നിവരുടെ അനുസ്മരണ പ്രമേയങ്ങള്‍ അവതരിപ്പിക്കും. എസ്.കെ.ജെ.എം ജില്ലാ പ്രസിഡന്റ് പി.ടി കുഞ്ഞുമുഹമ്മദ് മുസ്്‌ലിയാര്‍, പാലപ്പിള്ളി മേഖല ഖാളി അല്‍ഹാജ് പി മുഹമ്മദ് മുസ്്‌ലിയാര്‍ സന്നിഹിതരാകും. ആണ്ട് നേര്‍ച്ചയോടനുബന്ധിച്ച് നടക്കുന്ന പതാക ജാഥ ഇന്ന് രാവിലെ ഒന്‍പത് മണിക്ക് ദാറുത്തഖ്‌വ ക്യാംപസില്‍ നിന്നും ആരംഭിച്ച് വൈകുന്നേരം നാലിന് കോടാലി സെന്ററില്‍ സമാപിക്കും. പരിപാടിയുടെ വിജയത്തിനായി കേന്ദ്ര മുശാവറ അംഗവും സുന്നി മഹല്ല് ഫെഡറേഷന്റെ ജില്ലാ പ്രസിഡന്റുമായ ചെറുവാളൂര്‍ ഹൈദ്രോസ് മുസ്്‌ലിയാര്‍ ചെയര്‍മാനായുള്ള സംഘാടക സമിതി വിപുലമായ ഒരുക്കങ്ങളാണ് നടത്തിയിരിക്കുന്നത്.