മഞ്ചേരി: ഓട്ടോയില്‍ മറന്നുവച്ച പണം പൊലിസിന്റെ സമയോജിത ഇടപെടല്‍മൂലം തിരികെ ലഭിച്ചു. മഞ്ചേരിയിലാണ് സംഭവം. ബാങ്കിലേക്കു പണമടയ്ക്കാന്‍ പോയ വയനാട് സ്വദേശിയുടെ 1,70,000 രൂപയാണ് മഞ്ചേരി പോലിസിന്റെ സമയോജിതമായ ഇടപെടല്‍മൂലം തിരികെ ലഭിച്ചത്. കുട്ടിയുടെ ചികിത്സയ്ക്കുവേണ്ടി കടം വാങ്ങിയതായിരുന്നു തുക. മഞ്ചേരി കച്ചേരിപ്പടിയില്‍നിന്ന് ഓട്ടോറിക്ഷയില്‍ ബാങ്കിലേക്കു പോകുമ്പോഴാണ് ഓട്ടോറിക്ഷയില്‍ പണമടങ്ങിയ ബാഗ് മറന്നുവച്ചത്. ബാങ്കിലെത്തി പണം അടക്കാന്‍ നോക്കുമ്പോഴാണ് ബാഗ് നഷ്ടപ്പെട്ടതായി അറിയുന്നത്. ഉടന്‍തന്നെ പൊലിസില്‍ പരാതി നല്‍കുകയും ചെയ്തു.
അതേസമയം, ഇതേ ഒട്ടോറിക്ഷയില്‍ കയറിയ മഞ്ചേരി അക്ഷയ സെന്റര്‍ നടത്തുന്ന ജീവനക്കാരനാണ് പണമടങ്ങിയ ബാഗ് ഓട്ടോറിക്ഷയില്‍ കണ്ടത്. വിവരം മഞ്ചേരിയിലെ പെതുപ്രവര്‍ത്തകനായ ഹൈദ്രു ഹാജിയെ അറിയിക്കുകയും അദ്ദേഹം ഉടന്‍തന്നെ ഒട്ടോറിക്ഷയുടെ നമ്പറും മറ്റു കാര്യങ്ങളും മഞ്ചേരി സ്റ്റേഷനില്‍ അറിയിക്കുകയും ചെയ്തു. മഞ്ചേരി സി.ഐയുടെ നിര്‍ദേശപ്രകാരം എസ്.ഐ കൈലാസ്‌നാഥും സംഘവും ഓട്ടോറിക്ഷയും ഡ്രൈവറേയും കണ്ടെത്തി ചോദ്യംചെയ്തു പണം ഉടമസ്ഥനു തിരികെ ലഭ്യമാക്കുകയായിരുന്നു.