തിരുവനന്തപുരം: കേരള എഞ്ചിനീയറിങ്/ ആര്‍ക്കിടെക്ച്ചര്‍/ ഫാര്‍മസി/ മെഡിക്കല്‍/ മെഡിക്കല്‍ അനുബന്ധ മേഖലകളിലെ ബിരുദ കോഴ്‌സുകളുടെ പ്രവേശനത്തിനുള്ള (KEAM 2024) ഓണ്‍ലൈന്‍ അപേക്ഷ സമര്‍പ്പിക്കുന്ന തീയതി നീട്ടി. ഈ മാസം 19ന് വൈകീട്ട് അഞ്ച് വരെ അപേക്ഷിക്കാമെന്ന് പ്രവേശന പരീക്ഷ കമ്മീഷണര്‍ അറിയിച്ചു. 

സ്‌പോര്‍ട്‌സ് ക്വോട്ട; അപേക്ഷ ക്ഷണിച്ചു

തിരുവനന്തപുരം: സി.ഇ.ഇ- കീം 2024 അധ്യയന വര്‍ഷത്തില്‍ ആരംഭിക്കുന്ന വിവിധ പ്രൊഫഷനല്‍ ഡിഗ്രി കോഴ്‌സുകള്‍ക്ക് കായികതാരങ്ങള്‍ക്കായി സംവരണം ചെയ്ത സീറ്റുകളിലേക്ക് കേരള സ്റ്റേറ്റ് സ്‌പോര്‍ട്‌സ് കൗണ്‍സില്‍ അപേക്ഷ ക്ഷണിച്ചു. എന്‍ട്രന്‍സ് എക്‌സാമിനേഷന്‍സ് കമ്മീഷണര്‍ പുറപ്പെടുവിച്ച പ്രോസ്‌പെക്ടസിലെ 5.2.16 പ്രകാരം യോഗ്യതയുള്ള കായികതാരങ്ങള്‍ എന്‍ട്രന്‍സ് എക്‌സാമിനേഷന്‍സ് കമ്മീഷണര്‍ക്ക് സമര്‍പ്പിക്കുന്ന അപേക്ഷയുടെ ഫോട്ടോസ്റ്റാറ്റ് കോപ്പി, കായിക നേട്ടങ്ങളുടെ സര്‍ട്ടിഫിക്കറ്റുകളുടെ പകര്‍പ്പ് ഉള്‍പ്പെടെ കേരള സ്റ്റേറ്റ് സ്‌പോര്‍ട്‌സ് കൗണ്‍സില്‍ സമര്‍പ്പിക്കണം. 

കേരള സ്റ്റേറ്റ് സ്‌പോര്‍ട്‌സ് കൗണ്‍സില്‍ അംഗീകരിച്ച കായികയിനങ്ങളില്‍ 2022 ഏപ്രില്‍ ഒന്നുമുതല്‍ 2024 മാര്‍ച്ച് 31 വരെ ജില്ലയെ പ്രതിനിധീകരിച്ച് സംസ്ഥാന ജൂനിയര്‍/ യൂത്ത് മത്സരങ്ങളില്‍ പങ്കെടുത്ത് മൂന്നാം സ്ഥാനം കരസ്ഥമാക്കല്‍, റവന്യൂ ജില്ലയെ പ്രതിനിധീകരിച്ച് സംസ്ഥാന സ്‌കൂള്‍ ചാമ്പ്യന്‍ഷിപ്പില്‍ പങ്കെടുത്ത് പങ്കെടുത്ത് മൂന്നാം സ്ഥാനം കരസ്ഥമാക്കല്‍ എന്നിവയാണ് കുറഞ്ഞ യോഗ്യത. അപേക്ഷ സ്വീകരിക്കുന്ന അവസാന തീയതി ഏപ്രില്‍ 30. 

കൂടുതല്‍ വിവരങ്ങള്‍ക്ക് www.sportscouncil.kerala.gov.in ല്‍. 
അപേക്ഷകള്‍ അയക്കേണ്ട വിലാസം- സെക്രട്ടറി, കേരള സ്റ്റേറ്റ് സ്‌പോര്‍ട്‌സ് കൗണ്‍സില്‍, തിരുവനന്തപുരം-1 (ഫോണ്‍ നമ്പര്‍: 0471 2330167, 2331546)

വിദ്യാഭ്യാസ വാർത്തകള്‍ വാട്സ്ആപ്പിൽ ലഭിക്കാന്‍ ക്ലിക് ചെയ്യുക