മുംബൈ: മഹാരാഷ്ട്രയിലെ ബയാന്ദറില്‍ നാലുവയസുകാരിയെ കൂട്ടബലാത്സംഗം നടത്തി കൊലപ്പെടുത്തിയ ശേഷം ചെളിയില്‍ താഴ്ത്തിയ സംഭവത്തില്‍ മൂന്നു യുവാക്കള്‍ അറസ്റ്റില്‍. ബയാന്ദറിലെ ഒരു പുഴക്കരയില്‍ പാതി മൂടിയ നിലയില്‍ കുഞ്ഞിനെ കഴിഞ്ഞ വ്യാഴാഴ്ച കണ്ടെത്തിയിരുന്നു. തുടര്‍ന്നു നടത്തിയ അന്വേഷണത്തിലാണു പ്രതികളെ പിടികൂടിയത്.
കേസില്‍ പ്രതിയായ ഒരാള്‍ ഒളിവിലാണ്. ബയാന്ദറിലെ ആസാദ് നഗറില്‍ രക്ഷിതാക്കള്‍ക്കൊപ്പം താമസിക്കുന്ന കുഞ്ഞ് കഴിഞ്ഞയാഴ്ച വീട്ടുമുറ്റത്തു കളിക്കുന്നതിനിടെ കാണാതായിരുന്നു. തൊട്ടടുത്ത ദിവസം നാവ്ഗര്‍ പൊലിസ് സ്റ്റേഷനില്‍ തട്ടിക്കൊണ്ടുപോകല്‍ കേസ് രജിസ്റ്റര്‍ ചെയ്യുകയും ചെയ്തു. പലയിടങ്ങളിലും ഊര്‍ജിതമായി തെരച്ചില്‍ നടത്തിയെങ്കിലും വ്യാഴാചയോടെ ഗോള്‍ഡന്‍ നെസ്റ്റ് കോംപ്ലക്‌സിനടുത്തുള്ള വിജനമായ നദിക്കരയില്‍ പാതി മൂടിയ നിലയില്‍ കുട്ടിയുടെ മൃതശരീരം കണ്ടെത്തുകയായിരുന്നു.
തുടര്‍ന്ന് ജെ.ജെ ആശുപത്രിയിലെത്തിച്ചു നടത്തിയ പോസ്റ്റ്‌മോര്‍ട്ടത്തില്‍ കുട്ടി ലൈംഗിക പീഡനത്തിനിരയായതായി വ്യക്തമായി. പ്രതികള്‍ ഊഴംവച്ച് കുട്ടിയെ പീഡിപ്പിക്കുകയായിരുന്നുവെന്ന് പൊലിസ് പറഞ്ഞു.