മലപ്പുറം: അഴിമതിക്കെതിരായ വിജിലന്‍സ് വകുപ്പിന്റെ 'വിസില്‍ നൗ' പദ്ധതി തുടങ്ങി ഒരു മാസം പിന്നിട്ടപ്പോള്‍ മലപ്പുറം ജില്ലയില്‍നിന്നു ലഭിച്ചത് 28 പരാതികള്‍. കഴിഞ്ഞ മാസം ഒന്‍പതിന് തുടങ്ങിയ പദ്ധതിയില്‍ സംസ്ഥാനത്താകെ ഇതുവരെ 240 പരാതികളാണ് ലഭിച്ചത്. ഇതില്‍ 28 എണ്ണം ജില്ലയില്‍നിന്നാണ്. 43 പരാതികള്‍ ലഭിച്ച പാലക്കാട് ജില്ലയാണ് ഇക്കാര്യത്തില്‍ മുന്നില്‍.
വണ്ടൂര്‍ അംബേദ്കര്‍ കോളജിനുവേണ്ടി പുല്ലൂരിലെ മിച്ചഭൂമി തരംമാറ്റിയത്, ഗ്രാമപഞ്ചായത്തിലെ ചെയ്യാത്ത റോഡ് പ്രവൃത്തിക്ക് തുക നല്‍കിയത്, കുടുംബശ്രീ സാന്ത്വനം ഫണ്ടിലെ ക്രമക്കേട്, സബ് രജിസ്ട്രാര്‍ ഓഫിസിലെ അഴിമതി, അക്ഷയ സെന്ററിലെ അമിത ഫീസ് ഈടാക്കല്‍ തുടങ്ങിയ പരാധികളാണ് ജില്ലയില്‍നിന്നുള്ളത്.
വിവിധ സര്‍ക്കാര്‍ വകുപ്പുകളിലെ അഴിമതിക്ക് ഒരു പരിധി വരെ തടയിടാനാകുന്ന ഈ ആപ്ലിക്കേഷന്‍ പൊതുജനങ്ങള്‍ക്കും ഉദ്യോഗസ്ഥര്‍ക്കും ജനപ്രതിനിധികള്‍ക്കും പരിചയപ്പെടാനും അവസരമൊരുക്കുന്നുണ്ട്.