മലപ്പുറം: ഡ്രൈവിങ് ലൈസന്‍സിന് മതവേഷത്തിലുള്ള ഫോട്ടോ അനുവദിക്കാത്ത നടപടിക്കെതിരേ മലപ്പുറം ആര്‍.ടി.ഒ കെ.എം ഷാജിയെ മുനിസിപ്പല്‍ മുസ്‌ലിംലീഗ്, യൂത്ത്‌ലീഗ് പ്രവര്‍ത്തകര്‍ ഉപരോധിച്ചു. മലപ്പുറത്തു ഡ്രൈവിങ് ടെസ്റ്റിനെത്തുന്നവരെ ചില ഉദ്യോഗസ്ഥര്‍ മാനസികമായി പീഡിപ്പിക്കുന്നതായി പരാതി ഉയര്‍ന്നതിനെ തുടര്‍ന്നായിരുന്നു ഉപരോധം.
മഫ്ത, ഹിജാബ് തുടങ്ങിയ വേഷം ധരിച്ച സ്ത്രീകളുടെ ഫോട്ടോയാണ് പലതവണ മാറ്റിക്കൊണ്ടുവരാന്‍ നിര്‍ബന്ധിക്കുന്നത്. പാസ്‌പോര്‍ട്ടിനുപോലും ഇത്രയും കര്‍ശന നിലപാടില്ലെന്നിരിക്കെ ചില ഉദ്യോഗസ്ഥര്‍ ബോധപൂര്‍വം അപേക്ഷകരെ പലതവണ നടത്തിപ്പിക്കുകയാണെന്നു യൂത്ത്‌ലീഗ് നേതാക്കള്‍ ആരോപിച്ചു. ഇതു നിര്‍ബന്ധമുള്ള കാര്യമല്ലെന്നും ജില്ലയിലെ ട്രാന്‍സ്‌പോര്‍ട്ട് ഉദ്യോഗസ്ഥരുടെ യോഗത്തില്‍ ഇതിനു വ്യക്തത വരുത്തുമെന്നും ആര്‍.ടി.ഒ ഉറപ്പുനല്‍കി.
ഉപരോധത്തിന് ഹാരിസ് ആമിയന്‍, ഷമീര്‍ കപ്പൂര്‍, അഷ്‌റഫ് പാറച്ചോടന്‍, പി.കെ ഹക്കീം, ഹുസൈന്‍ ഉള്ളാട്ട്, സമീര്‍ വാളന്‍, പി ഷംസീര്‍, സി.കെ അബ്ദുറഹ്മാന്‍, സദാദ് കാമ്പ്ര, സുബൈര്‍ കോല്‍മണ്ണ, സുഹേല്‍ പറമ്പന്‍ നേതൃത്വം നല്‍കി.