പയ്യാവൂര്‍: കുന്നത്തൂര്‍പാടി മുത്തപ്പന്‍ ദേവസ്ഥാനത്തെ തിരുവപ്പന മഹോത്സവത്തിന് വന്‍ ഭക്തജനപ്രവാഹം. കഴിഞ്ഞ രണ്ടുദിവസങ്ങളില്‍ മാത്രം മൂന്ന് ലക്ഷത്തോളം ഭക്തര്‍ മുത്തപ്പ ദര്‍ശനത്തിനായി എത്തിയെന്നാണ് കണക്ക്. കഴിഞ്ഞ ദിവസങ്ങളില്‍ പാടിയില്‍ നിന്നും നാല് ഭാഗത്തേക്കുമുള്ള റോഡുകളില്‍ കിലോമീറ്ററുകളോളം ദൂരത്തില്‍ വാഹനങ്ങളുടെ നീണ്ട നിരയായിരുന്നു. ഇതിനാല്‍ പലരും കിലോമീറ്ററുകളോളം നടന്നാണ് കുന്നത്തൂര്‍ പാടിയില്‍ എത്തിയത്. ഉത്സവകാലങ്ങളില്‍ ലക്ഷക്കണക്കിന് ഭക്തര്‍ എത്തുന്ന കുന്നത്തൂരിലേക്ക് സ്‌പെഷല്‍ ബസുകള്‍ അനുവദിക്കാത്ത അധികൃതരുടെ നടപടി പ്രതിഷേധത്തിനിടയാക്കിയിട്ടുണ്ട്. ദിവസവും വെള്ളാട്ടം, തിരുവപ്പന, ഒന്നിടവിട്ട ദിവസങ്ങളില്‍ മൂലംപെറ്റ ഭഗവതി എന്നിവയാണ് കെട്ടിയാടുന്നത്. 16ന് രാത്രിയോടെ ഒരു മാസം നീളുന്ന ഉത്സവം സമാപിക്കും.