തിരുവനന്തപുരം: മഴക്കാലപൂര്‍വ പ്രവര്‍ത്തനത്തിന്റെ ഭാഗമായി പൊതുമരാമത്ത് റോഡുകളില്‍ അത്യാവശ്യ അറ്റകുറ്റപ്പണിക്ക് അനുമതി നല്‍കിയതായി മന്ത്രി ജി. സുധാകരന്‍ അറിയിച്ചു. ഇതിനായി 38 കോടി അനുവദിച്ചു. പത്തു ദിവസത്തിനകം പണികള്‍ പൂര്‍ത്തീകരിക്കണം. അതാത് തദ്ദേശ സ്വയംഭരണസ്ഥാപനങ്ങളുമായി ചര്‍ച്ച ചെയ്തായിരിക്കും അറ്റകുറ്റപണികള്‍ നടത്തുക. മഴക്കാലത്തെ റോഡ് അപകടങ്ങള്‍ ഒഴിവാക്കുകയാണ് ലക്ഷ്യം. റോഡിലെ വെള്ളക്കെട്ടുകള്‍ ഒഴിവാക്കാന്‍ പ്രത്യേക പരിഗണന നല്‍കും.
റോഡുകളിലെ ഓടകള്‍ വൃത്തിയാക്കുക, ജലനിര്‍ഗമനം ഉറപ്പാക്കുക, കലുങ്കുകള്‍ വൃത്തിയാക്കുക തുടങ്ങി എല്ലാ മഴക്കാല സുരക്ഷാ പ്രവര്‍ത്തനങ്ങളും നടത്താന്‍ നിര്‍ദേശം നല്‍കിയതായി മന്ത്രി വാര്‍ത്താസമ്മേളനത്തില്‍ അറിയിച്ചു. ഇതിന് ആദ്യഗഡുവായി 19 കോടിയാണ് ചെലവിടുക. ദേശീയപാതയുടെ ഇരുവശവുമായുള്ള എര്‍ത്തണ്‍ ഷോള്‍ഡറുകള്‍ പുനഃസ്ഥാപിക്കുന്നതിനായി 19 കോടി ചെലവിടും. ഇവ ഒലിച്ചു പോയതു മൂലം അപകടങ്ങള്‍ പതിവാകുന്നത് പരിഗണിച്ചാണിത്. അതിശക്തമായ മഴയുള്ളപ്പോള്‍ പണികള്‍ നടത്തരുതെന്ന് നിര്‍ദേശം നല്‍കിയിട്ടുണ്ട്. അനുവദിച്ചിരിക്കുന്ന പണം ദുരുപയോഗം ചെയ്യാന്‍ അനുവദിക്കില്ലെന്നും ജി. സുധാകരന്‍ പറഞ്ഞു.