ലണ്ടന്‍: ജി 7 അംഗരാജ്യങ്ങളുടെ ഉച്ചകോടിയില്‍ ഉത്തരകൊറിയക്ക് വിമര്‍ശനം. ഉത്തരകൊറിയ ആണവായുധവും ബാലിസ്റ്റിക് മിസൈലും പരീക്ഷിച്ചതാണ് ലോകനേതാക്കളെ ചൊടിപ്പിച്ചത്. വിഷയത്തില്‍ ശക്തമായ പ്രതിഷേധം രേഖപ്പെടുത്തിയ ജപ്പാന്‍ പ്രധാനമന്ത്രി ഷിന്‍സോ അബേ, ഉത്തരകൊറിയയ്‌ക്കെതിരേ അന്താരാഷ്ട്രതലത്തില്‍ നടപടി വേണമെന്നും ആവശ്യപ്പെട്ടു. ഉച്ചകോടിയില്‍ കാലാവസ്ഥാ വ്യതിയാനം, അഭയാര്‍ഥി പ്രശ്‌നം, ലോക സമ്പദ്‌വ്യവസ്ഥ, തീവ്രവാദം തുടങ്ങിയ വിഷയങ്ങള്‍ ചര്‍ച്ചചെയ്തു. അമേരിക്കന്‍ പ്രസിഡന്റ് ബരാക് ഒബാമ ഹിരോഷിമ സന്ദര്‍ശിച്ചതും യോഗത്തില്‍ പരാമര്‍ശിക്കപ്പെട്ടു.
എന്നാല്‍, ഒബാമയുടെ ഹിരോഷിമാ സന്ദര്‍ശനത്തെ വിമര്‍ശിച്ച് ഉത്തരകൊറിയ രംഗത്തെത്തി. ആണവായുധം പ്രയോഗിച്ച പ്രതിയെന്ന വിശേഷണം മറക്കാനാണ് അമേരിക്കന്‍ പ്രസിഡന്റ് തരംതാഴ്ന്ന രാഷ്ട്രീയക്കളി കളിച്ചതെന്നായിരുന്നു വിമര്‍ശനം. ജപ്പാന്‍, അമേരിക്ക, ഇംഗ്ലണ്ട്, ഫ്രാന്‍സ്, ജര്‍മനി, ഇറ്റലി, കാനഡ എന്നീ രാജ്യങ്ങളാണ് ജി 7ല്‍ ഉള്‍പ്പെടുന്നത്.