മൊഗ്രാല്‍ പുത്തൂര്‍: ഹയര്‍സെക്കന്‍ഡറി സ്‌കൂളില്‍ മികച്ച നിലയില്‍ കര്‍ഷക പ്രവര്‍ത്തനം സംഘടിപ്പിച്ച കുട്ടികള്‍ക്കുള്ള കുടുംബകൃഷി പുരസ്‌കാരം അലീമത്ത് നാഷിയയ്ക്ക്.
കുട്ടികളിലെ കൃഷിയോടുള്ള താല്‍പര്യം വളര്‍ത്താനും കാര്‍ഷിക സംസ്‌കാരം നിലനിര്‍ത്താനുമായി ഏര്‍പ്പെടുത്തിയ പുരസ്‌കാരം വീടുകളില്‍ കുടുംബങ്ങള്‍ക്കൊപ്പം മികവുറ്റ നിലയില്‍ കൃഷി നടത്തുന്ന കുട്ടികള്‍ക്കാണ് നല്‍കുക. വിദ്യാലയത്തിലെ മൊത്തം കുട്ടികളില്‍ നിന്നും അപേക്ഷ ക്ഷണിച്ചു കൃഷിയുടെ വിവരങ്ങള്‍ പരിശോധിച്ചാണ് അധ്യാപക സംഘം പുരസ്‌കാര ജേതാവിനെ തെരഞ്ഞെടുക്കുക.
സ്‌കൂളിലെ ആറാം ക്ലാസ് വിദ്യാര്‍ഥിനിയാണ് പുരസ്‌കാര ജേതാവായ അലീമത്ത് നാഷിയ. അധ്യാപകരായ എന്‍ സുരേന്ദ്രന്‍, ടി.എം രാജേഷ്, സി.വി സുബൈദ, എം മനോജ് കുമാര്‍ എന്നിവരാണ് പുരസ്‌കാര നിര്‍ണയ സമിതിയിലുണ്ടായിരുന്നത്. പ്രശസ്തി പത്രം, കാഷ് അവാര്‍ഡ്, തെങ്ങിന്‍ തൈ എന്നിവയടങ്ങുന്ന പുരസ്‌കാരം സ്‌കൂളില്‍ നടന്ന ചടങ്ങില്‍ സര്‍വശിക്ഷാ അഭിയാന്‍ ജില്ലാ പ്രൊജക്ട് ഓഫിസര്‍ കെ രവിവര്‍മന്‍ നാഷിയക്കു സമ്മാനിച്ചു.
ചടങ്ങില്‍ പ്രധാന അധ്യാപകന്‍ കെ അരവിന്ദ അധ്യക്ഷനായിരുന്നു. പി വേണുഗോപാലന്‍, മാഹിന്‍ കുന്നില്‍ സംബന്ധിച്ചു.