വെള്ളറട: കെ.എസ്.ആര്‍.ടി.സി ബസിനെ മറികടന്ന് അമിത വേഗത്തില്‍ പാഞ്ഞ സമാന്തരവാന്‍ മറിഞ്ഞ് പതിനഞ്ചോളം പേര്‍ക്ക് പരുക്കേറ്റു. ഇന്നലെ രാവിലെ 10 ന് വാഴിച്ചലിലെ വളവിലായിരുന്നു അപകടം. വെള്ളറട നിന്നും കള്ളിക്കാടിലേക്ക് പോവുകയായിരുന്ന വാനാണ് മറിഞ്ഞത്.
ശശികല(50), ആരതി കൃഷ്ണ(24), മിനി(30), വിഷ്ണു(20), അനന്ദു(19), സുകുമാരന്‍(55), ബാബു(56), രാജേന്ദ്രന്‍(58), വിജയകുമാരി(41), രാമചന്ദ്രന്‍(55), കുമാര്‍(18), അമല്‍(30), ജയരാജ്(43), സുകുമാരന്‍(47), ജോണ്‍(37) എന്നിവര്‍ക്കാണ് പരുക്കേറ്റത്. ഇവരെ വെള്ളറട സര്‍ക്കാര്‍ ആശുപത്രിയില്‍  പ്രാഥമിക ചികിത്സ നല്‍കിയ ശേഷം  പാറശാല സര്‍ക്കാര്‍ ആശുപത്രി, നെയ്യാറ്റിന്‍കര സര്‍ക്കാര്‍ ആശുപത്രി, തിരുവനന്തപുരം മെഡിക്കല്‍ കോളജ് എന്നിവടങ്ങളില്‍ പ്രവേശിപ്പിച്ചു.  
അപകടത്തെ തുടര്‍ന്നു ഇവിടെ ഏറെ നേരം ഗതാഗതം തടസപ്പെട്ടു. ആര്യന്‍കോട് പൊലിസും നാട്ടുകാരുമാണ് രക്ഷാപ്രവര്‍ത്തനം നടത്തിയത്. റോഡില്‍ ഒഴുക്കിപ്പരന്ന ഡീസല്‍  നെയ്യാര്‍ഡാമില്‍ നിന്നു ഫയര്‍ഫോഴ്‌സെത്തി വെള്ളം പമ്പു ചെയ്ത്  നീക്കം ചെയ്തു.