ചാവക്കാട്: ദേശീയപാത ഒരുമനയൂരില്‍ വാട്ടര്‍ അതോറിറ്റിയുടെ കുടിവെള്ള പൈപ്പ് പൊട്ടി വെള്ളം പാഴാകുന്നു. തിരക്കേറിയ ദേശീയപാതയില്‍ കഴിഞ്ഞ ദിവസം രാവിലെയാണ് പൈപ്പ് പൊട്ടിയത്. വീതി കുറഞ്ഞ ദേശീയപാതയോരത്തെ കുടിവെള്ള പൈപ്പ് പൊട്ടിയത് ഗതാഗത തടസത്തിനും കാരണമായി.
 വാട്ടര്‍ അതോറിറ്റി ജീവനക്കാരെത്തി പൊട്ടിയ കുടിവെള്ള പൈപ്പിന്റെ അറ്റകുറ്റപ്പണി നടത്തിയെങ്കിലും വൈകിട്ട് വീണ്ടും പൈപ്പ് പൊട്ടി വെള്ളം ചോരാന്‍ തുടങ്ങി.
 കുടിവെള്ളക്ഷാമം രൂക്ഷമായ ഒരുമനയൂര്‍ പഞ്ചായത്തിന്റെ വിവിധ ഭാഗങ്ങളിലേക്കുള്ള പൈപ്പാണ് പൊട്ടിയത്. പ്രദേശത്ത് വാട്ടര്‍ അതോറിറ്റി ജീവനക്കാര്‍ അറ്റകുറ്റപ്പണിക്കായി കുഴിയെടുത്തത് കാരണം പലയിടത്തും റോഡിനോട് ചേര്‍ന്ന് അപകടകരമായ കുഴികള്‍ രൂപപ്പെടുകയും ചെയ്തിട്ടുണ്ട്.വാട്ടര്‍ അതോറിറ്റി ജീവനക്കാര്‍ ശരിയായ വിധത്തില്‍ പൈപ്പ് അറ്റക്കുറ്റപ്പണി നടത്താത്തതാണ് വീണ്ടും പൈപ്പ് പൊട്ടാന്‍ കാരണമെന്ന് നാട്ടുകാര്‍ ആരോപിച്ചു.