പാരിപ്പള്ളി: കരിമ്പാലൂരില്‍ ജെ.സി.ബിയുമായി കല്ല് വെട്ടാനെത്തിയ സംഘത്തെ നാട്ടുകാര്‍ തടഞ്ഞു. ഇന്നലെ രാവിലെ കരിമ്പാലൂര്‍ കശുവണ്ടി ഫാക്ടറിക്ക് എതിര്‍വശത്തെ സ്വകാര്യ വ്യക്തിയുടെ 12 സെന്റ് പുരയിടത്തിലാണ് കല്ല് വെട്ട് സംഘമെത്തിയത്.
തുടര്‍ന്ന് അയല്‍വാസികള്‍ സംഘടിച്ചെത്തി  പ്രവര്‍ത്തനങ്ങള്‍ തടയുകയായിരുന്നു. വിവരമറിഞ്ഞ് പാരിപ്പള്ളി പൊലിസെത്തി ഇരുകൂട്ടരെയും
സ്‌റ്റേഷനിലെത്തിച്ചു. കല്ല് വെട്ടാന്‍ ഹൈക്കോടതി ഉത്തരവുള്ളതായും അതിനാല്‍ പ്രവര്‍ത്തനങ്ങള്‍ തടസപ്പെടുത്താന്‍
പാടില്ലെന്നും പൊലിസ് അറിയിച്ചു.
എന്നാല്‍ കലക്ടര്‍ക്ക് നേരത്തെ നല്‍കിയ പരാതിയുടെ അടിസ്ഥാനത്തില്‍ അനധികൃത കല്ല് വെട്ട് തടയണമെന്ന്  ജിയോളജി വകുപ്പിന് കലക്ടര്‍ നല്‍കിയ നിര്‍ദേശത്തിന്റെ രേഖ നാട്ടുകാര്‍ പൊലിസിനു മുന്നില്‍ വച്ചു. തുടര്‍ന്ന് രണ്ടു ദിവസത്തേക്ക് പ്രവര്‍ത്തനങ്ങള്‍ നിര്‍ത്താന്‍ പൊലിസ് നിര്‍ദ്ദേശിച്ചു. വിവരമറിഞ്ഞ് പാരിപ്പള്ളി വില്ലേജ് ഓഫിസര്‍ സ്ഥലം സന്ദര്‍ശിക്കുകയും തഹസീല്‍ദാര്‍ക്ക് റിപോര്‍ട്ട് നല്‍കുകയും ചെയ്തു. തങ്ങളുടെ വ്യാജ ഒപ്പിട്ടാണ് സമ്മതപത്രം തയ്യാറാക്കിയതെന്നും ജിയോളജിസ്റ്റ് നടപടിക്രമങ്ങള്‍ പാലിച്ചില്ലെന്നും നാട്ടുകാര്‍ ആരോപിച്ചു.  
വൈകിട്ട്  പ്രദേശവാസികള്‍  കലക്ടറെ സന്ദര്‍ശിച്ച്  വീണ്ടും പരാതി നല്‍കി. ഇതിന്റെ അടിസ്ഥാനത്തില്‍ ഇന്ന് വിശദമായ റിപ്പോര്‍ട്ട് നല്‍കുമെന്ന് വില്ലേജ് അധികൃതര്‍ അറിയിച്ചു.