മൂന്നാര്‍:  അനധികൃതമായി നായാട്ട് നടത്തിയ രണ്ടു പേരെ ദേവികുളം പൊലിസ് അറസ്റ്റ് ചെയ്തു. ആനയിറങ്കല്‍ ശങ്കരപാണ്ഡ്യന്‍മെട്ട് സെല്‍വം (30), ജസ്റ്റിന്‍ (42) എന്നിവരാണ് പിടിയിലായത്.  ആനയിറങ്കല്‍ വനത്തിനുള്ളിലും പരിസര പ്രദേശങ്ങളിലും പതിവായി നായാട്ട് നടത്തി വന്ന ഇരുവരെയും ശങ്കരപാണ്ഡ്യന്‍മെട്ടിലെ സെല്‍വത്തിന്റെ സ്വകാര്യ തോട്ടത്തില്‍ വച്ചാണ് പിടികൂടിയത്. നായാട്ടിനുപയോഗിച്ചിരുന്ന തോക്കും കണ്ടെടുത്തു. അനധികൃത നായാട്ട് നടത്തിയതിന് ആനയിറങ്കല്‍ സ്വദേശി കുമാറിനെ ഒരു മാസം മുമ്പ്  പോലീസ് പിടികൂടിയിരുന്നു. ഇയാളില്‍ നിന്നും ലഭിച്ച വിവരങ്ങളുടെ അടിസ്ഥാനത്തിലാണ് പ്രതികളെ പിടികൂടിയത്. സംഘത്തില്‍ കൂടുതല്‍ പേര്‍ ഉള്‍പ്പെട്ടിട്ടുണ്ടോ എന്ന് അന്വേഷിച്ചു വരികയാണെന്ന് പോലീസ് അറിയിച്ചു. കെ.ഡി.എച്ച്.പി കമ്പനിയും വനം വകുപ്പും നായാട്ട് കര്‍ശനമായി നിരോധിച്ചിരുന്ന വനങ്ങളിലാണ് ഇവര്‍ നായാട്ട് നടത്തി വന്നിരുന്നത്. പ്രതികളെ ദേവികുളം കോടതിയില്‍ ഹാജരാക്കി.